काठमाडौं, वैशाख १६ – नेपालको वित्तीय प्रणालीमा गहिरो धक्का पुर्याउने गरी १७ अर्बभन्दा बढीको अवैध कारोबारमा संलग्न २१ जना मनी ट्रान्सफर सञ्चालक पक्राउ परेका छन्। भन्सार चोरी पैठारी, सुन तस्करी र कर छलीजस्ता गम्भीर आर्थिक अपराधमा उनीहरू मुछिएको केन्द्रीय अनुसन्धान ब्युरो (सीआईबी)ले जानकारी दिएको छ। ब्युरोले सोमबार एक विज्ञप्ति जारी गर्दै मुलुकका विभिन्न जिल्लाबाट पक्राउ परेका व्यक्तिहरूमाथि राष्ट्र बैंक ऐन २०५८ अनुसार अनुसन्धान अघि बढाइएको जनाएको छ। पक्राउ परेकाहरू मोरङ, महोत्तरी, सप्तरी, सर्लाही, पर्सा, धनुषा, नवलपरासी, वीरगन्ज र चितवन जिल्लाबाट समातिएका हुन्। विदेशबाट आउने विप्रेषण रकमको आडमा, विद्यमान बैंकिङ प्रणालीलाई छलेर ठुलो परिमाणको अवैध रकमलाई वैध बनाइने आपराधिक नेटवर्क सञ्चालन भइरहेको सीआईबीले खुलासा गरेको छ। विशेषगरी विदेशमा रहेका नेपाली कामदार र विद्यार्थीहरूलाई प्रयोग गरी विप्रेषणको नाउँमा अवैध धन कारोबार गरिएको पाइएको छ। प्रवक्ता प्रहरी उपरीक्षक सुधीरराज शाहीका अनुसार मोरङबाट पक्राउ परेका दीपेन्द्रप्रसाद साहले मात्र करिब २ अर्ब ८२ करोड रुपैयाँ बराबरको कारोबार गरेको प्रमाण भेटिएको छ। उनीहरूले ‘सजिलो पे’, ‘पेवेल नेपाल’जस्ता डिजिटल वालेट र अन्य मनी ट्रान्सफर कम्पनीहरूको व्यापक दुरुपयोग गरेका थिए। ठुलो परिमाणको नगद रकम बैंक खातामा जम्मा गरी, त्यसपछि डिजिटल माध्यम र ट्रान्सफर सेवा प्रयोग गरेर झुटो विप्रेषणको रूपमा विभिन्न व्यक्तिका खातामा रकम सारिएको थियो।
जनवाच
