काठमाडौं । दुई परमाणु शक्ति सम्पन्न छिमेकी मुलुकबीचको तनाव फेरि चुलिएको छ। भारतले पाकिस्तान र पाकिस्तान प्रशासित कश्मीरमा मिसाइल आक्रमण गरेको समाचार सार्वजनिक भएपछि अन्तर्राष्ट्रिय समुदाय पुनः सतर्क बनेको छ। संयुक्त राष्ट्रसंघले यस्तो स्थितिप्रति गम्भीर चासो व्यक्त गर्दै दुबै पक्षलाई संयमित रहन आह्वान गरेको छ।
संयुक्त राष्ट्रसंघका महासचिव एन्टोनियो गुटेरेसका प्रवक्ता स्टेफन दुजारिकले गुटेरेस भारत–पाकिस्तानबीचको सैन्य गतिशीलताप्रति ‘गहिरो चिन्ता’ व्यक्त गरिरहेको जानकारी दिए। उनले भने, “कुनै पनि प्रकारको सैन्य भिडन्त, विशेषतः परमाणु हतियारसहितका मुलुकबीच, केवल दक्षिण एसियाका लागि होइन, पूरै संसारका लागि खतरा हुन सक्छ।”
सामाजिक सञ्जाल एक्समार्फत ५ मेमा महासचिव गुटेरेसले भारत–पाकिस्तान सम्बन्ध पछिल्ला वर्षहरूमध्ये अहिले सबैभन्दा तनावपूर्ण अवस्थामा पुगेको उल्लेख गरेका थिए। साथै, उनले २२ अप्रिलमा भारतको पहलगाममा भएको आतंकवादी हमलाको कडा शब्दमा निन्दा पनि गरेका थिए।
