काठमाडौं । राष्ट्रपति रामचन्द्र पौडेलले नेपाली पत्रकारितालाई लोकतन्त्रको मेरुदण्डको रूपमा चित्रण गर्दै सत्य, तथ्य र निष्पक्षतामा आधारित प्रेसले मात्र सशक्त राष्ट्र निर्माणमा योगदान दिनसक्ने धारणा व्यक्त गरेका छन्।

राष्ट्रिय पत्रकारिता दिवसको अवसरमा सञ्चार तथा सूचना प्रविधि मन्त्रालयद्वारा आयोजित सम्मान तथा पुरस्कार वितरण समारोहमा राष्ट्रपति पौडेलले प्रेस स्वतन्त्रता कुनै सजावट नभई लोकतन्त्रको सारभूत पक्ष भएको स्पष्ट पारे। “लोकतन्त्र विना निष्पक्ष पत्रकारिता सम्भव छैन, र पत्रकारिता विना लोकतन्त्र अपुरो रहन्छ,” उनले भने।

उनले राज्यको जिम्मेवारी पत्रकारहरूलाई निर्भीक र स्वतन्त्र वातावरणमा काम गर्न सक्ने सुनिश्चितता गर्नु हो भन्नेमा जोड दिँदै पत्रकारितामाथि असुरक्षा र दबाबको अन्त्य हुनुपर्ने धारणा व्यक्त गरे।

पछिल्ला वर्षहरूमा सूचना प्रविधिको तीव्र विस्तार, सामाजिक सञ्जालको व्यापक प्रयोग र नागरिक पत्रकारिताको उदयसँगै उत्पन्न चुनौतीहरूलाई राष्ट्रपति पौडेलले ‘प्रेसको नयाँ युगको परीक्षा’ भनेर व्याख्या गरे। “मिथ्या सूचना र भ्रमपूर्ण प्रचारको सामना गर्नु आजको पत्रकारिताको गम्भीर जिम्मेवारी हो,” उनले चेतावनी दिए।

कार्यक्रममा सूचना तथा सञ्चार प्रविधिमन्त्री पृथ्वी सुब्बा गुरुङले पत्रकारिता क्षेत्रलाई व्यवस्थित गर्न कानुनी सुधारको प्रक्रियामा सरकार लागिरहेको जानकारी गराए। ‘हामी अझै कानुनी संक्रमणकालमै छौं,’ मन्त्री गुरुङले भने, ‘तर संरचनागत सुधार र पत्रकार हितको सुरक्षामा सरकार गम्भीर छ।’

नेपाल पत्रकार महासङ्घका अध्यक्ष निर्मला शर्माले पत्रकारहरू आर्थिक संकट र व्यावसायिक अप्ठ्यारोमा रहेको उल्लेख गर्दै राज्यले पत्रकारिताको दिगोपनका लागि गम्भीर ध्यान दिनुपर्नेमा जोड दिइन्। पूर्वअध्यक्ष विपुल पोखरेलले प्रविधिसँग कदम मिलाएर जान नसके नेपाली पत्रकारिता अन्तर्राष्ट्रिय प्रतिस्पर्धामा पछि पर्ने चेतावनी दिए।