काठमाडौं, जेठ २ — आजदेखि काठमाडौंमा अन्तर्राष्ट्रिय जलवायु सम्मेलन ‘सगरमाथा संवाद’ सुरु भएको छ। विश्वभर देखा परिरहेका जलवायु परिवर्तनका जटिल असरहरूबारे बहस गर्न आयोजना गरिएको यो संवाद कार्यक्रममा १७५ जना विदेशी अतिथिसहित करिब ३५० जना सहभागी भएका छन्।
कार्यक्रमको उद्घाटन आज बिहान सोल्टी होटेल, ताहाचलमा भयो, जहाँ प्रधानमन्त्री केपी शर्मा ओलीले औपचारिक रूपमा उद्घाटन भाषण दिएका छन्। कार्यक्रममा परराष्ट्रमन्त्री आरजु राणा देउवाले स्वागत मन्तव्य दिएकी थिइन्।
तीन दिनसम्म चल्ने यस संवादमा तीन सत्रहरू सञ्चालन हुने छन्, जसमा उद्घाटन सत्र, विचार–विमर्श सत्र र विशेष अतिथिहरूका लागि सगरमाथाको हवाइ अवलोकन जस्ता कार्यक्रमहरू समावेश छन्।
संवादमा चीन, भारत, अजरबैजान, संयुक्त राष्ट्रसंघ लगायतका देश तथा संस्थाका प्रतिनिधिहरूको उपस्थितिले यो कार्यक्रमलाई अन्तर्राष्ट्रिय महत्व दिलाएको छ।
प्राकृतिक स्रोतहरू, हिमाल–हिमनदीको भविष्य र वातावरणीय न्याय जस्ता गम्भीर विषयमा केन्द्रित रहने संवाद जेठ ४ गतेसम्म चल्नेछ।
