काठमाडौं, वैशाख १५ – नेकपा (एकीकृत समाजवादी) का अध्यक्ष माधवकुमार नेपालले केही तत्वहरूले शिक्षकहरूको आन्दोलनबारे झूठो प्रचार गरेको आरोप लगाएका छन्।
शिक्षकहरूसँग भेटघाटपछि सञ्चारकर्मीहरूसँग कुरा गर्दै नेपालले आफूहरूले शिक्षकहरूको ऐक्यबद्धता र उत्साह अनुभूति गरेको बताए। “शिक्षकहरूले नाराबाजीसहित हाम्रो स्वागत गरेका हुन्, हामीलाई खेदेका होइनन्,” नेता नेपालले प्रष्ट पारे।
उनका अनुसार शिक्षकहरूको मागप्रति ऐक्यबद्धता जनाउन आफूहरू गएको र शिक्षकमाझ सकारात्मक ऊर्जा देखिएको अनुभव भएको थियो। “हामीले उनीहरूको मनोबल अझै बढेको पायौँ र त्यसपछि सम्मानपूर्वक बिदा भएका थियौँ,” उनले भने।
तर, केही गलत नियत राख्ने समूहले भ्रम फैलाउन खोजेको भन्दै नेपालले त्यसप्रति खेद व्यक्त गरे। “अनावश्यक र भ्रामक प्रचार गरेर शिक्षक आन्दोलनलाई बदनाम गर्ने प्रयास भइरहेको छ,” उनले आरोप लगाए।
