ललितपुर, जेठ ११ – प्रधानमन्त्री तथा नेकपा (एमाले) का अध्यक्ष केपी शर्मा ओलीले २०८४ सालको निर्वाचनलाई एमालेको स्पष्ट बहुमतको ‘मिशन’ का रूपमा अघि बढाउने दृढता व्यक्त गर्दै स्थानीय जनप्रतिनिधिलाई अब ढिलो नगरी पार्टी र जनताको सेवामा एकजुट भएर लाग्न आह्वान गर्नुभएको छ। बागमती प्रदेशस्तरीय वडाध्यक्ष प्रशिक्षण कार्यक्रमको उद्घाटन गर्दै ओलीले पार्टीसँग निर्वाचित जनप्रतिनिधिको सम्बन्ध निर्वाचनपछि चङ्गाको धागोजस्तै नछुट्नु पर्ने उल्लेख गर्दै, “हामी जितेर मात्र होइन, जितेर विकास र सुशासनमा नतिजा देखाउन आएका हौं,” भन्नुभयो। ओलीले निर्वाचित वडाध्यक्षहरूलाई आफूलाई जनताले किन पठाएका हुन् भन्ने कुरा गम्भीरताका साथ सम्झन आग्रह गर्दै भन्नुभयो, “निर्वाचनपछि पार्टी बिर्सने हो भने जनताले अर्कोचोटि सम्झिँदैनन्। तपाईँहरू एमालेका अनुहार मात्र होइन, अबको प्रतिबद्धता र भविष्यको जग पनि हो।” अध्यक्ष ओलीले विगतका राजनीतिक घटनाक्रमको प्रसंग उठाउँदै माओवादी नेतृत्व र केही पूर्व एमाले नेताहरूलाई “पार्टीलाई कब्जा गरेर अगाडि बढ्ने” मानसिकतामा आरोप लगाउनुभयो। “२०६४ मा हामी माओवादीको आतंकले हारेका थियौं, तर अहिले परिस्थिति फरक छ। अब न त माओवादीको त्यो छाया बाँकी छ, न त त्यस्तो भ्रममा जनता छन्,” उहाँको भनाइ थियो। ओलीले एमालेमाथि हुने आन्तरिक असहमति र भ्रम फैलाउने गतिविधिप्रति सचेत रहन निर्देशन दिँदै “अब भाँजो पर्ने होइन, बाँधिने हो” भन्ने शैलीमा कार्यकर्तालाई सम्बोधन गर्नुभयो। उहाँले यस्ता षड्यन्त्रहरू विदेशी प्रभाव र स्वदेशी प्रक्रियावादीहरूको मिलोमतो भएको आरोप समेत लगाउनुभयो। जेठ १५ गते हुने प्रदर्शनमा प्रतिगमनको आकांक्षा छ, त्यसको विपक्षमा हामी सावधान र सचेत रहनुपर्छ, ओलीले पार्टी कार्यकर्तालाई निर्देशन दिनुभयो।
जनवाच
