११ जेठ, काठमाडौं –नेपालको पूर्वाधार विकासको इतिहासमा ‘भूगोल जित्ने साहस’ को प्रतीक बन्दै नागढुंगा–सिस्नेखोला सुरुङमार्ग अब केही महिनापछि पूर्ण रूपमा सञ्चालनमा आउँदैछ। भौतिक पूर्वाधार तथा यातायातमन्त्री देवेन्द्र दाहालले आइतबार निर्माणस्थलको निरीक्षण गर्दै जानकारी दिएका हुन् कि आगामी १७ पुस (१ जनवरी २०२६) बाट यो सुरुङमार्ग पूर्णरूपमा सवारी आवागमनका लागि खुला गरिनेछ।
सुरुङमार्गको अवलोकनपछि सञ्चारकर्मीहरूसँग कुरा गर्दै मन्त्री दाहालले भने,
यो केवल यातायातको सुरुङ होइन, आधुनिक नेपालतर्फको सुरुङद्वार हो। यसले भौगोलिक जटिलता हटाउँदै समय, इन्धन र जीवनको बचत गर्नेछ।
सुरुङमार्गको सिभिल वर्क अक्टोबर २५ (८ कात्तिक) मा सकिने जानकारी दिँदै उनले ७ कात्तिकदेखि सामान्य सब-अपरेसन (परीक्षण चरण) सुरु हुने बताए।
करिब पाँच वर्ष लामो प्रतीक्षापछि सुरुङमार्ग अब सञ्चालनको नजिक पुगेको छ। झन्डै २.६९ किमी लामो सुरुङमार्ग काठमाडौं र धादिङ (त्रिभुवन राजपथ मार्ग) जोड्ने अत्यन्तै महत्त्वपूर्ण परियोजना हो, जसले सिस्नेखोलादेखि नागढुंगासम्मको यात्रा समय १५–२० मिनेटमा घटाउने अनुमान गरिएको छ।
मन्त्री दाहालले सुरुङमार्गलाई “राष्ट्रिय गौरवको प्रतीक” भन्दै भने,
यो केवल भौतिक पूर्वाधारको उपलब्धि हैन, सुरक्षित र दिगो यातायातको आधारशिला पनि हो। हामी यसलाई केवल निर्माण होइन, राष्ट्रिय मोडेलको रूपमा अघि बढाउँदैछौं।”
सुरुङको प्रमुख विशेषतामा आधुनिक भेन्टिलेसन, आपतकालीन निकास, अग्नि सुरक्षा प्रणाली, र सीसीटीभी निगरानी जस्ता पूर्वाधार समावेश गरिएका छन्।
