काठमाडौं, बैशाख ७। स्वास्थ्य तथा जनसंख्या मन्त्री प्रदीप पौडेलले समान स्वास्थ्य सेवा सुनिश्चित गर्न वैश्विक सहकार्य अपरिहार्य भएको बताएका छन्। स्विट्जरल्यान्डको जेनेभामा जारी ७८औं विश्व स्वास्थ्य सम्मेलन (World Health Assembly) मा सम्बोधन गर्दै उनले विश्व स्वास्थ्य प्रणालीका चुनौतीहरू साझा रूपमा समाधान गर्न नवीन सोच र एकजुट प्रयास आवश्यक रहेको धारणा राखे। महामारी पूर्वतयारीमा एकता र समानता अनिवार्यमन्त्री पौडेलले महामारीजस्ता संकटसँग जुध्न पूर्वतयारीका उपायहरूमा सबै राष्ट्रले समान पहुँच र सहभागिता पाउनुपर्नेमा जोड दिए। उनले विश्व स्वास्थ्य संगठन (WHO) द्वारा ल्याइएको नयाँ समझदारीको स्वागत गर्दै सदस्य राष्ट्रहरूबीच अझ बलियो सहकार्यको आवश्यक्ता औंल्याए। नेपालको स्वास्थ्य उन्नतिको कथा विश्वसामुसम्मेलनको अवसरमा मन्त्री पौडेलले नेपालले हासिल गरेका मातृ–शिशु मृत्युदरमा कमी, पोलियो उन्मूलन, तथा स्वास्थ्य बीमा प्रणालीको विकासबारे विश्व समुदायलाई जानकारी गराए। “महिला स्वास्थ्य स्वयंसेविका र विद्यालय स्वास्थ्य कार्यक्रमले जनस्तरमै सुधार ल्याएको छ,” उनले भने। त्यस्तै, खोपको पहुँच, डिजिटल स्वास्थ्य, र रोकथाममुखी सेवाहरूमा नेपालको प्रयासलाई पनि उनले विशेष रुपमा प्रस्तुत गरे। जलवायु परिवर्तन : नयाँ स्वास्थ्य संकटको रूपजलवायु परिवर्तन नेपाली स्वास्थ्य क्षेत्रमा गहिरो असर पारिरहेको उल्लेख गर्दै मन्त्री पौडेलले यसतर्फ वैश्विक ध्यानाकर्षण गराएका छन्। “हामी सगरमाथा संवादमार्फत यो सन्देश दिइरहेका छौं कि जलवायु परिवर्तन अब केवल वातावरणीय विषय होइन, स्वास्थ्य संकट पनि हो,” उनले भने। उनले जलवायु–स्वास्थ्य सम्बन्धी अन्तर्राष्ट्रिय सम्मेलन नेपालमै आयोजना गर्ने घोषणा पनि गरे। उच्चस्तरीय वार्तामा सहकार्यको प्रस्तावजेनेभामा रहेका मन्त्री पौडेलले विभिन्न देशका स्वास्थ्य अधिकारीहरूसँग भेटघाट गरी नेपालसँग सहकार्य विस्तारको प्रस्ताव राखिरहेका छन्। यसरी, एकातर्फ नेपालको स्वास्थ्य प्रगति विश्वसामु प्रस्तुत गर्दा अर्कातर्फ मन्त्री पौडेलले समान पहुँच, महामारी पूर्वतयारी र जलवायु संकटका विषयमा वैश्विक साझा रणनीति निर्माणका लागि दृढ अपिल गरेका छन्।
जनवाच
