काठमाडौं, १९ चैत – म्यानचेस्टर सिटीका मुख्य स्ट्राइकर एर्लिङ हालान्ड घाइते भएपछि क्लब तनावमा परेको छ। आइतबार भएको एफए कपको क्वार्टरफाइनलमा बोर्नेमाउथविरुद्ध खेल्दा उनको खुट्टामा चोट लागेको थियो। हालान्डले खेलको ६१औं मिनेटमा बराबरी गोल गर्दै टोलीलाई पुनः खेलमा फर्काएका थिए, जसपछि सिटीले २-१ को जित निकाल्दै सेमिफाइनलमा स्थान सुरक्षित गर्यो। तर, खेलपछि उनको खुट्टामा समस्या देखिएपछि उनलाई बैसाखी टेकेर हिँडिरहेको अवस्थामा देखिएको छ। हालान्डको चोट कत्तिको गम्भीर छ भन्ने यकिन नभए पनि क्लबले उनलाई विशेषज्ञसँग परीक्षण गराइरहेको जनाएको छ। सिटीका स्वास्थ्य टोलीले उनलाई बाँकी सिजनका खेलहरूका लागि फिट बनाउन सकिने आशा राखेको छ। हालान्ड यो सिजन ४० खेलमा ३० गोल गरिसकेका छन्, जसले उनको अनुपस्थितिले क्लबको प्रदर्शनमा ठूलो असर पार्न सक्छ भन्ने संकेत गरिरहेको छ। सिजनभर मुख्य खेलाडीहरू चोटग्रस्त भइरहँदा प्रशिक्षक पेप गार्डिओलाले कठिन चुनौतीको सामना गरिरहेका छन्। हाल प्रिमियर लिगमा सिटी पाँचौं स्थानमा छ भने च्याम्पियन्स लिगमा चेल्सीभन्दा एक अंकले पछि परेको छ।
जनवाच
