पर्सा, वैशाख १८ — अपहरणपछि बन्धक बनाएर रकम असुल्न खोज्ने गिरोह पर्सा प्रहरीले पक्राउ गरेको छ। पक्राउ परेका चारजनामध्ये एक नाबालकसमेत संलग्न रहेको खुलासा भएको छ।

वीरगन्ज महानगरपालिका–१२ का २३ वर्षीय रिकेश कुमार गुप्ता, २५ वर्षीय राजन गुप्ता, सखुवा प्रसौनी गाउँपालिका–३ का २४ वर्षीय सिकेन्द्र साह र एक नाबालकलाई कलैयाका २६ वर्षीय सुधीरप्रसाद साहलाई अपहरण गरी बन्धक बनाएको आरोपमा पक्राउ गरिएको हो।

पर्सा प्रहरी प्रमुख प्रहरी उपरीक्षक गौतम मिश्रका अनुसार, अपहरणपछि अपहरित व्यक्तिका परिवारसँग फिरौती मागिएको सूचना प्राप्त भएपछि प्रहरी तत्काल परिचालन गरिएको थियो।

वैशाख १६ गते राति पौने १० बजे वीरगन्ज–१२, मुर्लीस्थित एक घरबाट अपहरित साहलाई सकुशल उद्धार गरिएको प्रहरीको भनाइ छ।

प्रहरीले अभियुक्तहरूलाई “अपहरण तथा शरीर बन्धक” मुद्दामा पाँच दिन थुनामा राखी अनुसन्धान थालिएको जनाएको छ। घटनामा नाबालकको संलग्नता देखिनुले किशोरवयमा अपराधप्रतिको आकर्षण र गिरोहहरूको प्रयोगप्रति गम्भीर सोच आवश्यक देखिएको प्रहरीको भनाइ छ।