काठमाडौं, २३ चैत ।हाम्रो भान्सामा प्रायः नजरअन्दाज हुने गाजर केवल तरकारीको सजावटमा मात्र सीमित छैन, यो एक अत्यन्तै उपयोगी प्राकृतिक औषधि हो। आँखादेखि लिएर मुटुसम्म, छालादेखि लिएर मस्तिष्कसम्म—गाजरका लाभ प्रशस्त छन्। यही सन्देश फैलाउने उद्देश्यले प्रत्येक वर्ष अप्रिल ४ मा अन्तर्राष्ट्रिय गाजर दिवस मनाइन्छ। सन् २००३ मा सुरु भएको यो दिवसले सन् २०१२ पछि फ्रान्स, बेलायत, अमेरिका, जापान जस्ता देशहरूमा व्यापकता पाएको हो। तर गाजरको महत्व दिन विशेषभन्दा पनि जीवनशैलीमा नियमित रुपमा अपनाउनुमा छ। गाजर किन खाने? कारण यस्ता छन्ः गाजरमा पाइने बिटा क्यारोटिन, ल्युटिन र भिटामिन ए आँखाको ज्योती बचाउने काम गर्छ। नियमित सेवनले राता अन्धोपनजस्ता समस्याबाट जोगाउँछ। गाजरमा भएको उच्च मात्राको फाइबरले आन्द्राको कामलाई सहज बनाउँछ। कब्जियत टाढा राख्न चाहनुहुन्छ भने, गाजर राम्रै उपाय हो। गाजरले छालालाई भित्रैदेखि हाइड्रेट गराउँछ र कोलाजेन उत्पादनमा मद्दत गर्छ, जसले छालालाई जवान र स्वस्थ बनाउँछ। फाइबरयुक्त गाजरले लामो समयसम्म भोक लाग्न दिँदैन, जसले अनावश्यक खाजाबाट बचाउँछ र तौल घटाउन सहयोग पुर्याउँछ। काँचो गाजर चपाउँदा रयाल बढ्छ र यसले मुखमा हुने ब्याक्टेरियालाई हटाउन मद्दत गर्छ, जसले दाँतलाई बलियो बनाउँछ। गाजरमा भएको पोटासियम र एन्टिअक्सिडेन्टले रक्तचाप सन्तुलित राख्छ र मुटुलाई दीर्घकालीन रुपमा फाइदा पुर्याउँछ। गाजर नियमित खाँदा शरीरमा जम्मा भएका विषाक्त पदार्थहरू निस्किन्छन्, जसले शरीरलाई डिटोक्स गर्छ। गाजरमा भएको भिटामिन के र अन्य पोषक तत्त्वहरूले मानसिक स्पष्टता र ध्यान केन्द्रित गर्न सहयोग पुर्याउँछ। गाजरमा रहेको एन्टिअक्सिडेन्टले शरीरभित्रको अक्सिडेटिभ तनाव घटाउँछ, जसले छालाको चमक र कपालको स्वास्थ्य सुधार गर्छ। गाजरमा पाइने भिटामिन ई, सी र अन्य तत्वहरूले रोगसँग लड्ने क्षमता बढाउँछन्।
जनवाच
