काठमाडौं – काठमाडौंको ऐतिहासिक एवं धार्मिक स्थल स्वयम्भूमा यही फागुन १० देखि १७ गतेसम्म स्वयम्भू महोत्सव आयोजना हुँदैछ। तयारी अन्तिम चरणमा पुगेको छ, जहाँ परम्परा, संस्कृति, कला र सामुदायिक सहभागिताको अनुपम संगम देख्न पाइनेछ।

स्वयम्भूको गौरवलाई उजागर गर्ने महोत्सव

वडा नम्बर १५ को आयोजनामा हुने यो महोत्सव स्वयम्भू क्षेत्रको धार्मिक, सांस्कृतिक तथा सामाजिक पहिचानलाई प्रवर्द्धन गर्ने उद्देश्यले गरिएको हो। वडाध्यक्ष इश्वरमान डंगोलका अनुसार, “महोत्सव सबै स्थानीयको साझा पहिचान बनोस् भन्ने हाम्रो लक्ष्य हो। यसले समुदाय, संस्कृति र इतिहासलाई एकसाथ जोड्नेछ।”

के-के रहनेछ महोत्सवमा?

महोत्सवको मुख्य आकर्षणहरू यसप्रकार छन्:
सांस्कृतिक प्रदर्शनी: स्थानीय परम्परागत बाजा, चित्रकला, हुलाक टिकट, ऐतिहासिक मुद्रा र बौद्ध धर्मसम्बन्धी सामग्री प्रदर्शन।
मौलिक खानाका परिकार: नेवारी खानाका विशेष स्टलहरू।
स्वास्थ्य सेवा: निःशुल्क स्वास्थ्य परीक्षण र रक्तदान कार्यक्रम।
कलात्मक गतिविधि: रञ्जना लिपि लेखन, मुहार चित्रकला (फेस पेन्टिङ) जस्ता कार्यक्रम।
सांस्कृतिक कार्यक्रम र खेलहरू: स्थानीय कलाकारको प्रस्तुति र परम्परागत खेलकुद प्रतियोगिता।

स्वयम्भू: सम्पदाले भरिपूर्ण ऐतिहासिक धरोहर

स्वयम्भू महाचैत्य उपत्यकाको सबैभन्दा पुरानो र पवित्र स्थलहरूमध्ये एक हो। किंवदन्तीअनुसार, यहाँ बुद्धत्वको उज्यालो आफैं प्रकट भएको थियो, जसलाई महा मञ्जुश्रीले पोखरी सुकाएर बाहिर ल्याएका थिए।

स्वयम्भू स्तूपको संरचनाले बौद्ध धर्मको गहिरो दर्शनलाई प्रतिबिम्बित गर्छ:
अर्धगोलाकार गुम्बज – बुद्धत्व प्राप्त गर्ने मार्गको प्रतीक।
बुद्धका आँखा – प्रज्ञा (ज्ञान) र उपाय (करुणा) को प्रतिक।
त्रयोदश भुवन – आत्मज्ञान प्राप्त गर्नुपर्ने १३ चरणहरू।
चार पुर (नगरहरू) – पृथ्वी, वायु, तेज, र जलका प्रतीक।

समुदायको सहभागिता र ऐतिहासिक धरोहरको जगेर्ना

महोत्सवलाई सफल बनाउन स्थानीय समुदाय सक्रिय रूपमा संलग्न छन्। प्रवर्धनका लागि साइकल ¥यालीलगायत कार्यक्रम सम्पन्न भइसकेको छ भने, स्थानीय कलाकार र सांस्कृतिक समूहहरू आफ्नो प्रस्तुतिको तयारीमा जुटेका छन्।

स्वयम्भू महोत्सवले काठमाडौंको ऐतिहासिक सम्पदालाई जीवन्त राख्दै सांस्कृतिक पहिचानलाई अझ मजबुत बनाउने अपेक्षा गरिएको छ। स्थानीयवासी मात्र नभई सम्पूर्ण देशभरका भक्तजन, पर्यटक तथा संस्कृतिप्रेमीहरूलाई महोत्सव अवलोकनको निम्तो दिइएको छ।