काठमाडौं, वैशाख ८ — अमेरिकाको उपराष्ट्रपति जेडी भेन्स आज बिहान आफ्नी भारतीय मूलकी पत्नी ऊषा र तीन सन्तानसहित भारत भ्रमणमा दिल्ली आइपुगेका छन्। चारदिने यो भ्रमणलाई व्यापार, कूटनीति र पारिवारिक जरा खोजीको त्रिवेणीका रूपमा हेरिएको छ। उपराष्ट्रपति भेन्सकी श्रीमती ऊषा भेन्सको यो पहिलो भारत यात्रा हो। ऊषाका बाबुआमा भारतको आन्ध्र प्रदेशबाट अमेरिका गएका थिए। ऊषा अमेरिकामै जन्मेकी हुन् र सधैं आफूभित्रको ‘भारतीयपन’ जोगाउँदै आएकी छन्। यसपटक उनी आफ्ना सन्तानहरू इवान, विवेक र मीराबेललाई लिएर आफ्नो पुर्ख्यौली भूमि भेट्न पाएकी छन्। उपराष्ट्रपति भेन्सको स्वागतका लागि दिल्ली शहर सजिएको छ। सडकहरूमा विशाल होर्डिङहरू टाँगिएका छन् र सुरक्षा सतर्कता उच्चतम स्तरमा पुर्याइएको छ। दिल्ली ओर्लिएपछि भेन्स दम्पतीले परिवारसहित स्वामीनारायण अक्षरधाम मन्दिर दर्शन गर्ने कार्यक्रम रहेको छ। आज साँझ प्रधानमन्त्री नरेन्द्र मोदीले प्रधानमन्त्री निवासमा भेन्स परिवारको स्वागत गर्दै डिनरको आयोजना गरेका छन्। डिनरपछि दुई देशका उच्च अधिकारीबीच ट्यारिफ, व्यापार, सुरक्षा र आपसी सहयोगबारे महत्वपूर्ण वार्ता हुने बताइएको छ। भारतीय पक्षबाट विदेश मन्त्री एस. जयशंकर, राष्ट्रिय सुरक्षा सल्लाहकार अजित डोभाल, विदेश सचिव विक्रम मिस्री र भारतका अमेरिकी राजदूत विनय मोहन क्वात्रा सहभागी हुनेछन्। भारत र अमेरिका सन् २०३० सम्ममा आपसी व्यापार ५०० अर्ब अमेरिकी डलर पुर्याउने लक्ष्यमा अघि बढिरहेका छन्। ट्रम्प प्रशासनले सुरु गरेको आयात शुल्क (ट्यारिफ) नीतिका कारण देखिएको तनाव कम गर्न र आपसी समझदारी बनाउन भेन्सको यो यात्रा निर्णायक मानिएको छ। आजै राति उपराष्ट्रपति भेन्स परिवारसहित जयपुर प्रस्थान गर्नेछन्, जहाँ उनीहरू रामबाग प्यालेसमा बसोबास गर्ने छन्। वैशाख ९ गते आमेर फोर्ट, सिटी प्यालेस र जन्तर–मन्तर अवलोकन गर्नुका साथै इन्टरनेसनल बिजनेस समिटमा पनि सहभागी हुने छन्। भोलिपल्ट वैशाख १० गते ताजमहल अवलोकनका लागि आग्रा भ्रमण हुनेछ। वैशाख ११ गते जयपुर फर्किएर अमेरिका फर्कने कार्यक्रम तय गरिएको छ। भेन्सको यो भ्रमण केवल राजनीतिक हैन — यसमा भावनात्मक गहिराइ पनि जोडिएको छ। एउटै यात्रामा राजनीतिक रणनीति, पारिवारिक उत्साह र कूटनीतिक सम्बोधन मिसिएको यो भ्रमणले भारत–अमेरिका सम्बन्धमा नयाँ ऊर्जा थप्ने छ।
जनवाच
