हेटौंडा । राप्रपा नेपालका अध्यक्ष र पूर्व उपप्रधानमन्त्री कमल थापाले देशको रक्षा र समृद्धिका लागि राजा र जनताको साझेदारी अपरिहार्य रहेको बताएका छन्। शुक्रबार हेटौडामा आयोजित अगुवा कार्यकर्ता भेटघाट कार्यक्रममा बोल्दै उनले, राजनीतिक दलहरूको एकताको अभाव र बाह्य शक्तिहरूको हस्तक्षेपका कारण देश आर्थिक र राजनीतिक संकटमा फसेको उल्लेख गरे।

अध्यक्ष थापाले राष्ट्रिय एकताको महत्त्वलाई जोड दिँदै भने, “आजको विभाजित राजनीतिक दलहरूको स्थिति देशको लागि खतरनाक छ। यदि हामी एकजुट भएर काम नगरे भने बाह्य शक्तिहरूको आक्रमण असहज हुनेछ।” उनले बिपी कोइरालाको मेलमिलाप नीति कार्यान्वयन नगरेको खण्डमा राष्ट्रियता र प्रजातन्त्रको भविष्य अनिश्चित हुने चेतावनी दिए।

थापाले प्रजातन्त्र दिवसको अवसरमा राजाले दिएका सकारात्मक सन्देशलाई अपमान गर्नु गलत रहेको भन्दै, “यो संविधानले बिचार र स्वतन्त्रताको ग्यारेन्टी गरेको छ, त्यसैले राजाको विचारलाई सम्मान गर्नु पर्छ।” उनले थपे, “राजा र जनताको साझेदारीले मात्र देशलाई एकताबद्ध राख्न सक्छ।”

उनले हिन्दु राष्ट्र र संवैधानिक राजसंस्थाको पक्षमा लाखौं जनताको समर्थन रहेको भन्दै, “आजको राजनीतिक प्रणालीले मुलुकको हितमा काम गर्न सकेको छैन, त्यसैले हामीलाई राजसंस्था र हिन्दु राष्ट्रको पुनःस्थापना गर्नु पर्छ।” थापाले विदेशी प्रभाव र आन्तरिक संकटलाई चुनौती दिँदै राप्रपाको एकता आवश्यक रहेको बताएका छन्।