काठमाडौं, १८ वैशाख — काठमाडौं महानगरको समग्र विकास र पूर्वाधार सुदृढीकरणका विषयमा जापानी सहयोग अझै सशक्त रूपमा अघि बढ्ने संकेत मिलेको छ। **नेपालका लागि जापानी राजदूत मायदा टोरु र काठमाडौं महानगरपालिकाका मेयर बालेन्द्र शाह (बालेन)**बीच बुधबार भएको भेटवार्ताले शहरी विकासको नयाँ सम्भावनाको ढोका खोलेको छ।
काठमाडौंस्थित जापान दूतावासका अनुसार, भेटमा काठमाडौं महानगरको भविष्यको विकास रणनीति, शहरी योजना, पूर्वाधार निर्माण, शहरी सौन्दर्य वृद्धिजस्ता विषयमा गम्भीर छलफल भयो। काठमाडौंलाई वातावरणमैत्री, व्यवस्थित र सुरक्षित महानगर बनाउने प्रयासमा जापानले विगतदेखि नै सघाउँदै आएको छ।
राजदूत मायदाले दरबार स्क्वायर क्षेत्रको वातावरणीय सुधार, ऐतिहासिक ढुंगेधाराको पुनर्संरचना, सडक विस्तार, बहुउद्देश्यीय मार्शल आर्ट केन्द्रलगायत थुप्रै परियोजनामा जापानको सहयोग निरन्तर रहने प्रतिबद्धता व्यक्त गरे।
मेयर शाहले काठमाडौंको दीर्घकालीन विकासका लागि अन्तर्राष्ट्रिय सहकार्य अपरिहार्य रहेको भन्दै जापानको सहयोगप्रति आभार व्यक्त गरे। उनले महानगरको समग्र रूपान्तरणका लागि प्रविधि, लगानी र नीतिगत समर्थनमा जापानसँग सहकार्य गर्न इच्छुक रहेको धारणा राखे।
