काठमाडौं, फागुन १५ – नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले हालको सरकारप्रति गम्भीर असन्तुष्टि जनाएका छन्। उनले आफ्नो नेतृत्वको सरकारले गरेका सुधारहरूलाई वर्तमान सरकारले रोक्ने प्रयास गरिरहेको आरोप लगाए।
सुनसरीको देवानगन्ज गाउँपालिकामा आयोजित ‘जनतासँग माओवादी, तराई–मधेश जागरण अभियान’ कार्यक्रमलाई सम्बोधन गर्दै प्रचण्डले कृषि, शिक्षा, नागरिकता र आर्थिक क्षेत्रका सुधारलाई वर्तमान सरकारले बेवास्ता गरिरहेको गुनासो गरे।
प्रचण्डका अनुसार आफ्नो सरकारको पालामा कृषि मल आपूर्ति सहज बनाइएको थियो, तर अहिले किसान फेरि मल अभावको समस्यामा परेका छन्। साथै, विद्यार्थीहरूलाई समयमै पाठ्यपुस्तक उपलब्ध गराउने व्यवस्था मिलाइएको भए पनि अहिले फेरि ढिलाइ हुन थालेको उनले बताए।
उनले नागरिकताविहीन नागरिकलाई अधिकार सुनिश्चित गर्न कानुन बनाए पनि हालसम्म यसको प्रभावकारी कार्यान्वयन नभएको गुनासो गरे। मधेसका भ्रमणका क्रममा उनले नागरिकता वितरणसम्बन्धी समस्या यथावत् रहेको गम्भीर गुनासो सुनेको बताए।
प्रचण्डले वर्तमान सरकारले जनताले प्राप्त गरेका सुधार तथा संविधान प्रदत्त अधिकारसमेत खोस्न खोजेको आरोप लगाए। संविधान संशोधनको बहानामा अधिकार कटौती गर्ने योजना असफल हुने दाबी गर्दै उनले भ्रष्टाचार अन्त्य र समाजवादी क्रान्ति अघि बढाउन लाखौं जनता एकजुट हुनुपर्ने बताए।
मधेसको मुख्य सम्भावना कृषि क्षेत्रमा रहेको उल्लेख गर्दै प्रचण्डले कृषि पेन्सन, कृषि बीमा, शीत भण्डार र बजार उपज बिक्री केन्द्र स्थापना गर्न आवश्यक रहेको बताए। यसका लागि आफ्नो पार्टीले पहल गर्ने प्रतिबद्धता व्यक्त गरे।
