काठमाडौं । नेपाल राष्ट्र बैंकले आज सुनका असर्फी बिक्री गर्दैछ । तिहारको धनतेरसको अवसरमा केन्द्रीय बैंकले मंगलबार विहान ११ बजेदेखि ४ बजेसम्म सुनका असर्फी बिक्री गर्न लागेको हो ।
चाँदीका सिक्का, मेडालियन तथा स्मारिका कात्तिक ११ गतेदेखि नै बिक्री वितरण गरिरहेपनि सुनका असर्फी भने आज एकदिन मात्र बिक्री गरिने केन्द्रीय बैंकले जनाएको छ ।
एक व्यक्तिले २.५ ग्राममा किन्न पाउने
आज धनतेरसका दिन सुनचाँदीका असर्फीको माग ठूलो रहने भएपनि असर्फी, सिक्काको सीमितताका कारण बिक्रीको समय र परिमाणमा कोटा तोकिएको राष्ट्र बैंकले जनाएको छ । आज एकदिन मात्र सुनको असर्फी बिक्री गर्ने जनाएको राष्ट्र बैंकले एक व्यक्तिका लागि २.५ ग्राम अर्थात् एउटा मात्र सुनको असर्फी उपलब्ध गराइनेछ ।
यता चाँदीको सिक्का तथा तक्मा भने माग अनुसार नै उपलब्ध गराउने बैंकले जनाएको छ । सुनको असर्फीको मूल्य भने आज कायम हुने सुनको बजार मूल्य अनुसार नै हुनेछ ।
