काठमाडौं — शिक्षा र व्यवसायबीचको दूरी घटाउँदै साइम कलेज र टोक्मा टेक्नोलोजिजबीच एक प्रभावकारी सहकार्यको थालनी गरिएको छ। यो सहकार्य केवल MoU मा सीमित नभइ, विद्यार्थीलाई ‘इन्डस्ट्री-रेडी’ बनाउने उद्देश्यले कक्षा र करियरबीचको व्यावहारिक पुल निर्माण गर्न केन्द्रित छ। ललितपुरमा आयोजित कार्यक्रममा साउथ एशियन इन्स्टिच्युट अफ म्यानेजमेन्ट (साइम कलेज) र Tokma Technologies Pvt. Ltd. बीच तीन वर्षका लागि समझदारीपत्रमा हस्ताक्षर भएको हो। कलेजका प्राचार्य अशोकराज पाण्डे र टोक्माका निर्देशक सागर आङदेम्बेले उक्त समझदारीमा हस्ताक्षर गरे। सम्झौताले विद्यार्थीहरूलाई इन्डस्ट्रीसँग जोड्न इन्टर्नशिप, संयुक्त अनुसन्धान परियोजना, ह्याकाथन, विशेषज्ञ सत्र, पाठ्यक्रम विकास, तथा व्यावसायिक चुनौतीहरूमा सहभागी गराउनेछ। यसले सैद्धान्तिक शिक्षालाई सीपमा रूपान्तरण गर्दै रोजगारीमा प्रत्यक्ष प्रतिस्पर्धी बनाउने लक्ष्य राखेको छ। साइम कलेजका प्राचार्य पाण्डेले भने, “अब शिक्षालय केवल प्रमाणपत्र दिने संस्थामा सीमित रहनु हुँदैन, यो समझदारी प्रयोगात्मक शिक्षा र नवप्रवर्तनको नयाँ युगतर्फको सुरुवात हो।” टोक्माले पनि विद्यार्थीलाई रियल-टाइम प्रोजेक्ट र अनुसन्धानमा सहभागी गराउने प्रतिबद्धता जनाएको छ। One Cover Pvt. Ltd. का सीईओ तथा क्यान महासंघका उपाध्यक्ष चिरञ्जीबी अधिकारीले यस सहकार्यलाई नेपालको सूचना प्रविधि क्षेत्रको विकासतर्फको ठोस कदम भने। उनले नेपाललाई “आइटी उद्यमशीलता हब” बनाउने सपनामा यो सहकार्यले टेवा पुर्याउने धारणा राखे। यो सहकार्य केवल साइम र टोक्माको लागि मात्र नभई, समग्र शैक्षिक क्षेत्रका लागि नमुना बन्ने संकेत देखिएको छ। खासगरी, निजी शैक्षिक संस्थाहरू र प्राविधिक कम्पनीहरूबीच यस्ता सहकार्यहरू व्यापक रुपमा विस्तार गर्न सकेमा सीपमुखी शिक्षा, उद्यमशीलता र रोजगारीबीचको दूरी घट्नेछ। साइम र टोक्माको सहकार्यले नेपाली युवालाई प्रमाणपत्रभन्दा पर, व्यवहारिक दक्षता र उद्यमशील सोचका साथ तयार पार्ने ‘स्मार्ट मोडल’ प्रस्तुत गरेको छ। अब शिक्षालयबाट सुरु भएको यात्रा सिधा उद्योगसम्म पुग्ने बाटोमा अघि बढ्दैछ — जहाँ विद्यार्थीहरू केवल डिग्रीधारी होइन, समाधान निर्माता बन्नेछन्।
जनवाच
