वासिङ्टन डिसी— अमेरिकी पूर्व राष्ट्रपति तथा पुनः उम्मेदवार डोनाल्ड ट्रम्पले स्वास्थ्य नीतिमा ठूलो सुधार ल्याउने संकेत दिँदै, अमेरिकी नागरिकले अब ‘विश्व बजार दर’ अनुसार औषधि किन्न पाउने दाबी गरेका छन्।
चीनसँगको व्यापार वार्तालाई चर्चा गर्दै ट्रम्पले अब औषधिमा ‘ट्यारिफ’ स्तरको मूल्य समानीकरण गर्ने योजना अघि सारेका हुन्। उनका अनुसार, अब अमेरिकन जनता औषधिका लागि अन्य विकसित देशका नागरिकले जति तिर्छन्, त्यति नै तिर्नेछन्—न बढी, न कम।
“बेलायत, युरोपियन युनियन लगायतका मुलुकमा एकै औषधिका लागि अमेरिकी नागरिकले धेरैपटक बढी रकम तिर्नुपरेको विडम्बनाको अन्त्य गर्छु,” ट्रम्पले भने। “अब हामी युरोप बराबरको दरमा औषधि खरिद गर्न सक्छौं—स्वास्थ्यमा अन्यायको अन्त्य हुनेछ।”
उनको भनाइमा, अमेरिकी बजारमा एउटै औषधिको मूल्य अन्य देशको तुलनामा १० गुणासम्म महँगो रहेको विगतलाई फेरि दोहोरिन दिइने छैन। उनले औषधि उद्योगलाई ‘नाफामुखी प्रवृत्ति’ छाडेर जनमुखी बन्न स्पष्ट सन्देश दिएका छन्।
यो घोषणा ट्रम्पको सम्भावित दोस्रो कार्यकालका प्राथमिक एजेन्डामध्ये एक बन्ने संकेत देखिन्छ। चुनावी मैदानमा स्वास्थ्य खर्चलाई केन्द्रीय विषय बनाएर जनताको दैनिक जीवनसँग गाँसिएको मुद्दालाई उठाउनु, उनको रणनीतिमा परिवर्तनको संकेत पनि मानिएको छ।
