काठमाडौं । नेपालमा डिजिटल बैंकिङलाई नयाँ उचाइमा पुर्याउने लक्ष्यसहित ग्लोबल आइएमई बैंक लिमिटेडले अन्तर्राष्ट्रिय वित्त निगम (आईएफसी) सँग डिजिटल रुपान्तरण तथा एम्बेडेड फाइनान्स प्रवर्द्धनका लागि रणनीतिक साझेदारी गरेको छ। सम्झौतामा बैंकका प्रमुख कार्यकारी अधिकृत सुरेन्द्रराज रेग्मी र आईएफसीका एफआईजी, एशिया तथा प्यासिफिक रिजनल इन्डष्ट्रि डाइरेक्टर एलेन फोर्लेमुले हस्ताक्षर गरेका छन्। यस समझदारीअनुसार, आईएफसीले बैंकको डिजिटल बैंकिङ क्षमतामा सुधार ल्याउने रणनीतिक परामर्श प्रदान गर्नेछ। आईएफसीले ग्लोबल आइएमई बैंकको डिजिटल म्याचुरिटी मूल्यांकन, डेटा व्यवस्थापन सुधार, डिजिटल सेवा प्रवर्द्धन र फिनटेक नवाचारका सम्भाव्यता अध्ययन गर्नेछ। यसले बैंकलाई प्रविधि-संचालित सेवा विकास गर्न ठूलो मद्दत पुग्नेछ। ‘हामी ग्राहकहरूलाई अन्तर्राष्ट्रिय स्तरको डिजिटल बैंकिङ सेवा प्रदान गर्न प्रतिबद्ध छौं। यस साझेदारीले डिजिटल वित्तीय सेवामा नवीनतम प्रयोग गर्न सहयोग गर्नेछ।’ – सुरेन्द्रराज रेग्मी, प्रमुख कार्यकारी अधिकृत, ग्लोबल आइएमई बैंक। सम्झौताअनुसार, आईएफसीले एम्बेडेड फाइनान्स मोडेल प्रवर्द्धन गर्दै ग्लोबल आइएमई बैंकलाई नयाँ प्रविधिमा आधारित वित्तीय सेवाहरू विस्तार गर्ने सल्लाह दिनेछ। डिजिटल भुक्तानी र फिनटेक नवाचारलाई नेपालमा प्रभावकारी बनाउन ग्लोबल आइएमई बैंकले महत्वपूर्ण कदम चालेको छ। ग्लोबल आइएमई बैंक नेपालभर ३५५ शाखा, ३८५ एटिएम, २३७ शाखारहित बैंकिङ सेवा, ६७ एक्सटेन्सन काउन्टर र ३ विदेशस्थित प्रतिनिधि कार्यालयमार्फत सेवा दिइरहेको छ। साथै, बैंकले अमेरिका, बेलायत, क्यानडा, अस्ट्रेलिया, मलेशिया, जापान लगायत देशहरूबाट रेमिट्यान्स सेवा प्रदान गरिरहेको छ। यस बैंकलाई ग्लोबल फाइनान्सको बेष्ट बैंक अवार्ड २०२४ र युरो मनी अवार्ड फर एक्सिलेन्स २०२४ बाट सम्मानित गरिएको छ, जसले यसको उत्कृष्ट सेवाको प्रमाण दिन्छ।
जनवाच
