काठमाडौं, ७ फागुन – भारतमा अध्ययनरत नेपाली विद्यार्थीहरूको सुरक्षासँग सम्बन्धित घटनाले नेपाल सरकारलाई कूटनीतिक रूपमा सक्रिय बनाएको छ। बुटवलकी प्रकृति लम्सालको ओडिसामा रहस्यमय मृत्यु भएपछि विद्यार्थीहरू आन्दोलनमा उत्रिए, जसले नेपाल सरकारलाई कूटनीतिक पहल बढाउन बाध्य बनाएको हो।
मन्त्रिपरिषद बैठकमा सुरक्षा प्राथमिकता
मंगलबार बसेको मन्त्रिपरिषद् बैठकमा नेपाली विद्यार्थीहरूको सुरक्षा सुनिश्चित गर्न विशेष पहल गर्ने निर्णय भएको छ। प्रधानमन्त्री केपी शर्मा ओलीले भारतसँग उच्च तहमा समन्वय गरी समस्या समाधान गर्ने प्रतिबद्धता जनाएका छन्। परराष्ट्रमन्त्री आरजु राणा देउवाले दिल्लीस्थित नेपाली दूतावासमार्फत अनुसन्धान प्रक्रिया निगरानी गर्ने जानकारी दिएकी छन्।
सरकारका एक मन्त्रीका अनुसार, हालसम्म ओडिसा घटनाबारे ठोस निर्णय नभए पनि, नेपाली विद्यार्थीको सुरक्षा कडा बनाउन कूटनीतिक प्रयास तीव्र पार्ने निष्कर्ष निकालिएको छ।
के भयो ओडिसामा?
रूपन्देहीकी २० वर्षीय प्रकृति लम्साल, जो भुवनेश्वरको केआईआईटी कलेजमा बी-टेक तेस्रो वर्षमा अध्ययनरत थिइन्, आइतबार होस्टेलको कोठामा झुन्डिएको अवस्थामा मृत फेला परेकी थिइन्।
प्रकृतिले कलेजकै छात्र अड्विक श्रीवास्तवबाट दुर्व्यवहार भएको उजुरी दिएकी थिइन्, तर कलेज प्रशासनले गम्भीरता नदेखाएर घटना ढाकछोप गर्ने प्रयास गरिरहेको आरोप विद्यार्थीहरूले लगाएका छन्।
घटनापछि नेपाली विद्यार्थीहरू आन्दोलित भए। तर, कलेज प्रशासनले आन्दोलन दबाउने नाममा विद्यार्थीहरूमाथि कुटपिट गर्दै केहीलाई निष्कासन गर्यो। स्थिति थप बिग्रिएपछि नेपाल सरकारले तत्काल हस्तक्षेप गर्दै विद्यार्थीको सुरक्षा र अध्ययनको वातावरण सुरक्षित बनाउने पहल सुरु गर्यो।
नेपाल सरकारको कूटनीतिक हस्तक्षेप
नेपाल सरकारको दबाबपछि कलेज प्रशासनले गल्ती स्वीकार्दै निष्कासित विद्यार्थीलाई पुन: भित्र्याउने निर्णय गर्यो। साथै,
ओडिसा सरकारले घटनाबारे छानबिन गर्न उच्चस्तरीय समिति गठन गरेको छ।
नेपालको परराष्ट्र मन्त्रालयले दिल्लीस्थित दूतावासबाट टोली ओडिसा पठाई अनुसन्धानको विस्तृत जानकारी लिने पहल गरिरहेको छ।
शिक्षा मन्त्रालयले प्रभावित विद्यार्थी र अभिभावकका लागि आकस्मिक सहायता कक्ष स्थापना गरेको छ।
