काठमाडौं, २१ वैशाख।अमेरिकाका पूर्वराष्ट्रपति डोनाल्ड ट्रम्प फेरि एक पटक धार्मिक संवेदनशीलताको सीमाना नाघ्दै चर्चाको केन्द्र बनेका छन्। यसपटक उनी पोपको पहिरनमा प्रस्तुत भएपछि क्याथोलिक समुदायभित्र आक्रोश फैलिएको छ। ह्वाइट हाउसको आधिकारिक सामाजिक सञ्जालमार्फत पोस्ट गरिएको एआई निर्मित उक्त तस्बिरमा ट्रम्प सेतो क्यासक, परम्परागत मिटर टोपी, ठूलो क्रससहित ‘पोप झैं’ प्रस्तुत भएका छन्। तर यो दृश्य पोप फ्रान्सिसको मृत्यु र नयाँ पोन्टिफ चयनको संवेदनशील समयसँग मेल खाँदा धार्मिक भावनामा ठेस पुगेको बताइएको छ। न्यूयोर्क राज्य क्याथोलिक सम्मेलनले ट्रम्पमाथि ‘विश्वासको अपमान’ गरेको गम्भीर आरोप लगाएको छ। उनीहरू भन्छन्, “हामीले भर्खरै प्रिय पोप फ्रान्सिसलाई गुमाएका छौं, यस्तो बेलामा यस्तो तस्बिर हास्यास्पद होइन, घातक हो।” ट्रम्पले केही समयअघि ‘म पोप बन्न चाहन्छु’ भनी दिएको व्यङ्ग्यात्मक अभिव्यक्तिको केही दिनमै यो तस्बिर सार्वजनिक भएको हो, जसले धेरैलाई यसको पछाडि राजनीतिक उद्देश्य रहेको अनुमान गर्न बाध्य बनाएको छ। भ्याटिकनले यस विषयमा बोल्न अस्वीकार गरेको छ, तर धार्मिक वृत्तहरूमा यसको आलोचना तीव्र छ। यसैबीच, विश्वभरि रहेका क्याथोलिक समुदाय सामाजिक सञ्जालमा ट्रम्पको तस्बिरलाई ‘अनुचित’, ‘अपमानजनक’ भन्दै विरोध जनाइरहेका छन्।
जनवाच
