काठमाडौं, २४ चैत — नेपाली कांग्रेसका सभापति तथा पूर्वप्रधानमन्त्री शेरबहादुर देउवा आइतबार पत्रकार सुरेश रजकको परिवारसँग भेट गर्न डल्लुस्थित निवास पुगेका छन्। तीनकुने घटनामा ज्यान गुमाएका पत्रकार रजकको परिवारप्रति संवेदना प्रकट गर्दै, देउवाले घटनाको निष्पक्ष छानबिन र दोषीउपर कडा कारबाहीको प्रतिबद्धता जनाए।
चैत १५ गते काठमाडौंको तीनकुनेमा भएको प्रदर्शनको क्रममा रिपोर्टिङ गरिरहेका एभिन्युज टेलिभिजनका पत्रकार सुरेश रजकको शव एक निजी घरमा जलेको अवस्थामा फेला परेको थियो। घटना रहस्यमय भएपछि प्रेस स्वतन्त्रता र पत्रकार सुरक्षाको सवालमा बहस चर्किएको छ।
सभापति देउवाले भने, “यो केवल एउटा पत्रकारको मृत्यु होइन, सम्पूर्ण प्रेस स्वतन्त्रतामाथिको चोट हो। दोषीलाई उन्मुक्ति दिन छुट छैन।” उनले सरकारलाई निष्पक्ष र गहिरो अनुसन्धानमा कुनै सम्झौता नगर्न आग्रह गरे।
पत्रकार रजकको मृत्युलाई लिएर संचारकर्मीहरू, मानवअधिकारकर्मी र नागरिक समाजले घटना गम्भीर भएको भन्दै छानबिनको माग गरिरहेका छन्। देउवाको यो भेटले राजनीतिक तहबाट पनि घटनाको गम्भीरतालाई पुष्टि गरेको देखिन्छ।
