काठमाडौं । काठमाडौं महानगरपालिकाले सहरी ट्राफिक व्यवस्थापनलाई प्रभावकारी बनाउन १८० नगर प्रहरीलाई विशेष तालिम दिने भएको छ।
आजदेखि राष्ट्रिय सभा गृहमा सुरु भएको १५ दिने तालिम तीन समूहमा विभाजन गरिएको छ, जसअनुसार प्रत्येक समूहमा ६० जना नगर प्रहरी रहनेछन्। तालिम सैद्धान्तिक तथा प्रयोगात्मक दुबै विधिमा संचालन हुनेछ।
काठमाडौं उपत्यका ट्राफिक प्रहरी कार्यालयका प्रमुख एसएसपी विनोद घिमिरे का अनुसार महानगरपालिकाले सहरी व्यवस्थापनको जिम्मेवारी लिइसकेकाले नगर प्रहरीबाट ट्राफिक व्यवस्थापनका कार्य अझ प्रभावकारी हुने अपेक्षा गरिएको छ।
“ट्राफिक व्यवस्थापन केवल कानुन कार्यान्वयनको विषय मात्र होइन, यो नागरिकलाई सहज सेवा दिने प्रक्रिया पनि हो।” – एसएसपी घिमिरे
महानगर ट्राफिक विज्ञ जगतमान श्रेष्ठ ले मानव स्रोतबाट संचालित ट्राफिक व्यवस्थापनलाई अझ गतिशील बनाउन नगर प्रहरीको भूमिकालाई प्रभावकारी बनाइने बताएका छन्।
तालिममा नगर प्रहरीलाई सवारी तथा यातायात ऐन, ट्राफिक संकेत चिन्ह, सडक सुरक्षा, दुर्घटना व्यवस्थापन, कूटनीतिक सवारीका नियम, ट्राफिक व्यवस्थापनमा प्रविधिको प्रयोग लगायतका विषयमा ज्ञान दिइनेछ।
महानगर प्रहरी बलका प्रमुख एसएसपी राजुनाथ पाण्डे ले नगर प्रहरीलाई व्यावसायिक, अनुशासित र कुशल बनाउन नियमित तालिम सञ्चालन गरिने बताएका छन्। नगर प्रहरीको क्षमता अभिवृद्धिका लागि २०७७ सालमा महानगर प्रहरी बलको संरचना विस्तार गरिएको थियो, जसलाई हालैको महानगर प्रहरी ऐन २०८० ले थप सशक्त बनाएको छ।
नगर प्रहरीले नगरपालिकाको सम्पत्ति सुरक्षा, सार्वजनिक स्थल व्यवस्थापन, चाडपर्व तथा सभा समारोह व्यवस्थापन, सरसफाइ, विपद् व्यवस्थापन, वातावरणीय सुधार लगायतका २८ वटा जिम्मेवारी सम्हाल्ने कानुनी व्यवस्था छ।
