काठमाडौँ – सन् २०१६ मा रिलिज भएको रोमान्टिक ड्रामा ‘सनम तेरी कसम’ पुनः रिलिजमा अप्रत्याशित रूपमा सफल भएपछि यसको सिक्वेलको चर्चा सुरु भएको छ। तर, फिल्मको निरन्तरताबारे निर्माता र निर्देशकबीच विवाद चुलिएको छ।
रि-रिलिजमा दोब्बर कमाइ, तर सिक्वेलमाथि अन्योल
यो फिल्म ७ फेब्रुअरीमा पुनः रिलिज गरिएपछि बक्स अफिसमा शानदार कमाइ गरिरहेको छ। २०१६ मा १६.०३ करोड कमाएको फिल्मले अहिले ३४.२९ करोड माथि उठाइसकेको छ। यसले ‘रि-रिलिजमा सबैभन्दा धेरै कमाउने फिल्म’ को सूचीमा स्थान बनाएको छ।
तर, जब फिल्मको दोस्रो संस्करण (सिक्वेल) निर्माणको चर्चा चल्न थाल्यो, त्यसपछि निर्माता दीपक मुकुट र निर्देशकद्वय राधिका राव र विनय सप्रु बीच टकराव सुरु भएको छ।
निर्माताको दाबी – ‘फिल्मको अधिकार मेरो हो’
निर्माता दीपक मुकुटले बलिउड हंगामासँग कुरा गर्दै भने, ‘सनम तेरी कसम’ को सबै अधिकार मेरो नाममा छ। यसका सिक्वेल, प्रिक्वेल वा रिमेक बनाउने अधिकार पनि मसँग मात्र छ।’
उनले थपे, ‘मैले सेप्टेम्बर २०२४ मा हर्षवर्धन राणे अभिनीत सिक्वेल घोषणा गरिसकेको छु। तर, निर्देशकहरूले मसँग कुनै छलफल नगरी सिक्वेलबारे अन्तर्वार्ता दिइरहेका छन्। यो पूर्ण रूपमा गलत हो। मैले अहिलेसम्म निर्देशक तय गरिसकेको छैन।’
निर्देशकद्वयको अडान – ‘हामीले सिक्वेल घोषणा गरिसकेका छौं’
दोस्रो तर्फ, निर्देशक राधिका राव र विनय सप्रुले केही समयअघि ‘सनम तेरी कसम २’ बनाउने घोषणा गरिसकेका थिए। उनीहरू निर्माताको दाबीप्रति असन्तुष्ट छन्।
सिक्वेलमा को-को रहने?
निर्माता मुकुटका अनुसार, हर्षवर्धन राणे पुनः मुख्य भूमिकामा देखिनेछन्। तर, अभिनेत्रीको छनोट भइसकेको छैन।
अब हेर्न बाँकी छ, निर्माता र निर्देशकबीचको यो विवाद कसरी समाधान हुन्छ? के ‘सनम तेरी कसम २’ निर्माण टिमको सहमतिमा अघि बढ्नेछ, वा यो कानुनी लफडासम्म पुग्नेछ?
