काठमाडौं । काठमाडौंमा जारी नेपाल प्रिमियर लिग (एनपीएल) को प्लेअफ राउन्ड पुग्ने पहिलो टोली जनकपुर बोल्ट्स बनेको छ । बिहीबार कीर्तिपुरस्थित टीयू क्रिकेट ग्राउन्डमा भएको लिगचरणको खेलमा काठमाडौं गुर्खाजलाई पाँच विकेटले हराउँदै जनकपुर प्लेअफ चरणमा प्रवेश गरेको हो ।
हालसम्म खेलेको छ वटा खेलमा पाँच वटामा जित निकाल्दै जनकपुरले लिग चरणको अन्तिम खेल खेल्नुअघि नै प्लेअफमा स्थान पक्का गरेको हो । जनकपुरले ६ खेलमा एक खेल गुमाउँदै ५ जितसहित १० अंक जोडेर शीर्ष स्थानमा रहेको छ ।
आजको खेलमा काठमान्डुले दिएको १०२ रनको लक्ष्य पछ्याएको जनकपुरले १५.५ ओभरमा ५ विकेट गुमाएर १०४ रन बनाउँदै लक्ष्य पूरा गरेको हो ।
जनकपुरको जितमा जीमी नीशमले १७ बलमा १ चौका र ३ छक्का मदतमा सर्वाधिक २७ रन बनाए भने हर्श थाकरले अविजित २५ रन योगदान गरे । उनले २५ बल खेल्दा १ चौका र १ छक्का प्रहार गरेका थिए ।
लाहिरु मिलान्थाले १६ र कप्तान अनिल साहले ११ रन बनाए । मोहम्मद मोहसिनले अविजित १३ रन जोडे । बलिङमा काठमान्डुका करण केसीले २ तथा शाहब आलम, जेर्राड एरासमस रदिपेश कँडेलले समान १ विकेट लिए ।
त्यसअघि जनकपुरका ललित राजवंशीले उत्कृष्ट बलिङ गर्दै ३ विकेट लिएपछि टस जितेर पहिले ब्याटिङ गरेको काठमान्डु जनकपुरको धारिलो बलिङ सामु टिक्न नसक्दा १९।३ ओभरमा सबै विकेट गुमाएर १०१ रनमा अलआउट भएको थियो ।
