काठमाडौँ। काठमाडौंको पशुपति धर्मशाला विवादमा मारवाडी सेवा समितिले आफूहरूलाई बहालदार नभएर मोहीको रूपमा रहेको दाबी गर्दै काठमाडौँ महानगरपालिकाको बल प्रयोगको तयारीप्रति आपत्ति जनाएको छ। समितिले बुधबार पत्रकार सम्मेलनको आयोजना गरी अदालतको अन्तिम निर्णय नआएसम्म कुनै किसिमको हस्तक्षेप नगर्न आग्रह गरेको हो।
यो विवाद तब सतहमा आयो जब काठमाडौँ महानगरपालिका र पशुपति क्षेत्र विकास कोषले धर्मशाला तथा गौशालाको सञ्चालन व्यवस्थापनसम्बन्धी सहमतिपत्रमा हस्ताक्षर गरेपछि महानगरपालिकाले धर्मशाला खाली गर्नका लागि प्रहरी परिचालन गरेको थियो। महानगरले माइकिङ गरी धर्मशालालाई खाली गर्न भनेको छ, जसलाई समितिले अन्यायपूर्ण ठहर गरेको छ।
मारवाडी सेवा समितिले भने, श्री ३ जुद्धशम्शेरले धार्मिक सेवाका लागि दिएको जग्गामा आफूहरूको मोहीयानी हक रहेको दाबी गरेको छ। उक्त धर्मशाला र गौशालामा समितिले विभिन्न सामाजिक सेवाहरु पनि सञ्चालन गर्दै आएको छ, जसमा निःशुल्क डायलासिस सेवा, कृत्रिम खुट्टा वितरण, होमियोप्याथिक स्वास्थ्य परीक्षण, शववाहन सेवा, र गाईपालनबाट निःशुल्क दूध आपूर्ति गर्ने कार्यहरू समावेश छन्।
समितिले अदालतको फैसलापछि पुनरावेदन गर्न पाउने कानुनी अधिकार भएको भन्दै दशैं बिदा अवधिभर महानगरले बल प्रयोग गर्नु अन्याय भएको दाबी गरेको छ। धर्मशालाको स्वामित्व र सञ्चालनका विषयमा भएको सम्झौता खारेज भएसँगै, पशुपति क्षेत्र विकास कोषले धर्मशालालाई धार्मिक प्रयोजनका लागि फिर्ता लिन लागेको हो।
समितिले अदालतको पूर्ण फैसला नआउँदासम्म आफ्नो सेवा अविच्छिन्न रुपमा सञ्चालन गर्नका लागि सहयोग गर्न सबै पक्षसँग आग्रह गरेको छ।
