काठमाडौं । ग्लोबल आइएमई बैंकले आर्थिक वर्ष २०८०/८१ को तेस्रो त्रैमाससम्म आइपुग्दा बैंकले ३७.१२ प्रतिशतले नाफा वृद्धि गर्न सफल भएको छ। गत वर्षको सोही अवधिमा ३ अर्ब ३० करोड रुपैयाँ नाफा कमाएको बैंकले यसपालि ४ अर्ब ५३ करोड रुपैयाँ खुद नाफा आर्जन गर्न सकेको हो। यो उपलब्धि बैंकको वित्तीय अनुशासन, लागत नियन्त्रण, र जोखिम व्यवस्थापन क्षमताको प्रमाण मानिएको छ। बैंकको इम्पेरमेन्ट चार्ज (ब्याज असुलीको जोखिमका लागि छुट्याइएको रकम) अघिल्लो वर्षको ५ अर्ब २६ करोडबाट घटेर यसपालि ३ अर्ब ११ करोडमा झरेको छ, जसले नाफा बढाउन महत्वपूर्ण भूमिका खेलेको देखिन्छ। खुद ब्याज आम्दानीमा ५.४६ प्रतिशतको गिरावट आए पनि बैंकको सञ्चालन नाफा ३४.४१ प्रतिशतले बढेको छ। बैंकले ६ अर्ब ३३ करोड रुपैयाँभन्दा बढी सञ्चालन नाफा कमाएको छ, जुन समग्र व्यवस्थापन कार्यशैली प्रभावकारी भएको संकेत हो। बैंकको चुक्ता पुँजी ३८ अर्ब रुपैयाँ, जगेडा कोषमा २८ अर्ब रुपैयाँ, र ५ खर्ब १७ अर्ब रुपैयाँ निक्षेप रहेको छ। यसैगरी, ४ खर्ब १३ अर्ब रुपैयाँ कर्जा लगानी गर्दै बैंकले आक्रामक तर सन्तुलित बैंकिङ रणनीति अपनाएको देखिन्छ। ग्लोबल आइएमई बैंकको प्रति सेयर आम्दानी (EPS) १५ रुपैयाँ ८६ पैसा पुगेको छ भने प्रति सेयर नेटवर्थ १७३ रुपैयाँ ४७ पैसा रहेको छ। यसले आगामी दिनमा लगानीकर्ताका लागि आकर्षक लाभांशको संकेत पनि दिन्छ।
जनवाच
