काठमाडौँ – नेपाली रुपैयाँको तुलनामा विदेशी मुद्राहरूको विनिमय दरमा उल्लेखनीय उतारचढाव देखिएको छ। नेपाल राष्ट्र बैंकले आइतबारका लागि प्रकाशित गरेको विनिमय दरअनुसार अमेरिकी डलर स्थिर भए पनि केही विदेशी मुद्राहरू — विशेषगरी खाडी मुलुकका मुद्रा — नेपाली रुपैयाँभन्दा धेरै नै बलिया देखिएका छन्।
सबैभन्दा महँगो बनेको मुद्रा कुवेती दिनार हो, जसको बिक्री दर ४४४ रुपैयाँ ४६ पैसा पुगेको छ। त्यसैगरी बहराइन दिनारको बिक्री दर ३६२ रुपैयाँ ५८ पैसा, ओमनी रियाल ३५५ रुपैयाँ ०५ पैसा र साउदी रियाल ३६ रुपैयाँ ४२ पैसा रहेको छ।
यता, युरोपियन युरोको विनिमय दर १५१ रुपैयाँ ५ पैसा र ब्रिटिस पाउन्ड १७७ रुपैयाँ ६२ पैसा कायम भएको छ। स्वीस फ्र्याङ्कको दर पनि १६० रुपैयाँ पार गर्दै १६० रुपैयाँ ९४ पैसा पुगेको छ।
एशियाली मुद्राहरूमा जापानी येन (१० येन) ९ रुपैयाँ ४३ पैसा, चिनियाँ युआन १८ रुपैयाँ ७७ पैसा र भारतीय रुपैयाँ (१०० रुपैयाँ) १६० रुपैयाँ १५ पैसामा कारोबार भइरहेको छ।
यस्तै, साउथ कोरियन वन ९ रुपैयाँ ४३ पैसा, थाई भाट चार रुपैयाँ, र मलेसियन रिङ्गेट ३० रुपैयाँ ८० पैसामा कारोबार भइरहेको छ।
विदेशमा कार्यरत नेपालीहरूका लागि यो विनिमय दरले महत्त्वपूर्ण प्रभाव पार्छ। विशेषगरी खाडी मुलुकमा कार्यरत नेपालीहरूले पठाउने रेमिट्यान्समा विनिमय दरको यो फरकले प्रत्यक्ष असर पुर्याउँछ। कुवेत, बहराइन, ओमनजस्ता देशबाट पठाइने रेमिट्यान्सले अहिलेको दरअनुसार झनै ठूलो रकम नेपाली रूपैयाँमा रूपान्तरण हुने देखिन्छ।
राष्ट्र बैंकले यो दर आवश्यकतानुसार जुनसुकै बेला परिवर्तन गर्न सकिने जनाउँदै अद्यावधिक जानकारीका लागि आफ्नो वेबसाइट हेर्न उपभोक्तालाई आग्रह गरेको छ। यसका साथै वाणिज्य बैंकहरूले तोक्ने दरमा केही अन्तर हुनसक्ने जानकारी पनि दिइएको छ।
