काठमाडौं, चैत २३ ।ललितपुरको सानेपामा अहिले एउटा विशेष स्वाद गुञ्जिएको छ — नेपाली कफीको स्वाद। तर, यो फेस्टिभल केवल स्वादमा सीमित छैन, रोजगारी, उद्यमशिलता र निर्यात सम्भावनाको सुगन्ध समेत बोकेर आएको छ। ‘नेपाल कफी फेस्टिभल एण्ड च्याम्पियनसिप २०८१’ नाम दिइएको तीनदिने यो मेलाले नेपाली कफी उद्योगको बहुआयामिक विकासको संकेत गरेको छ। नेपाल कफी व्यवसायी महासंघले आयोजना गरेको यो कार्यक्रम उत्पादकदेखि उपभोक्ता, किसानदेखि निर्यातक र युवादेखि लगानीकर्तासम्म सबैलाई एउटै प्लेटफर्ममा ल्याउने प्रयास हो। महासंघका अध्यक्ष ओमनाथ अधिकारी भन्छन्, “हामी केवल फेस्टिभल गर्दैछौं भन्ने होइन, हामी नेपाली कफीलाई भविष्यको सम्भावना बनाउन लागेका छौं।” उनका अनुसार, यो फेस्टिभलले नेपाली कफीको गुणस्तर सुधार, बजार विस्तार, र उद्यमशिलताको प्रवर्द्धनमा टेवा दिनेछ। साथै, अन्तर्राष्ट्रिय बजारमा प्रतिस्पर्धा गर्न सक्ने क्षमताको विकास गर्न समेत यो मेला रणनीतिक रूपमा महत्वपूर्ण छ। फेस्टिभलमा कफी प्रदर्शनी, टेस्टिङ सेसन, राष्ट्रिय स्तरको च्याम्पियनसिप र विविध ब्रान्डहरूको प्रदर्शनी भइरहेको छ। कफीमा नयाँ प्रविधिको प्रयोग र नविनतम ट्रेन्डबारे पनि जानकारी आदानप्रदान भइरहेको छ। “युवाहरूको आकर्षण कफी उद्योगमा बढ्नु जरुरी छ,” भन्छन्, रोयल हिमालय कफीका सञ्चालक मदन सापकोटा। उनले यस्तो मेलाले कफीलाई रोजगारी र स्टार्टअपको माध्यम बनाउन सक्ने विश्वास व्यक्त गरे। नेपालको हावापानी, भौगोलिक बनावट र जैविक उत्पादन प्रणालीले उच्च गुणस्तरको अर्गानिक कफी उत्पादन गर्न सक्ने क्षमता राख्छ। तर, त्यसको प्रयोग, प्रवर्द्धन र ब्रान्डिङ अझै कमजोर छ। यस्तै मेलाले यी पक्षमा ध्यान दिन आवश्यक छ।
जनवाच
