काठमाडौं, चैत २२- स्वादिलो तरकारीको रूपमा चिनिने सजिवन (ड्रमस्टिक) अब आधुनिक खानपानमा औषधीय गुणले भरिएको ‘सुपरफुड’का रूपमा स्थापित हुँदैछ। विशेषगरी यसको सूप स्वास्थ्यप्रेमीहरूका लागि दिनहुँको डाइटमा अनिवार्य बन्दै गएको छ। सजिवनको सुपलाई हड्डी बलियो बनाउने प्राकृतिक टोनिकका रूपमा लिन थालिएको छ।

तरकारीको भाँडोबाट अब सूपको कटोरासम्म आइपुगेको सजिवनले शरीरभित्रको सुरक्षा पर्खाल निर्माण गरिरहेको छ। यसको सेवनले शरीरलाई केवल स्वाद मात्र होइन, रोगसँग लड्ने शक्ति पनि दिइरहेको छ।

सजिवनमा क्याल्सियमको मात्रा अत्यन्तै उच्च हुन्छ। सुपको रूपमा सेवन गर्दा क्याल्सियमको प्रभावकारी शोषण हुन सक्ने भएकाले यसले हड्डी बलियो बनाउन निर्णायक भूमिका खेल्छ। ओस्टियोपोरोसिस वा जोर्नी दुख्ने समस्याबाट ग्रस्तहरूका लागि यो सूप एक प्रभावकारी घरेलु उपाय बन्न सक्छ।

भिटामिन सी र एन्टिअक्सिडेन्टले भरिपूर्ण सजिवन सूपले शरीरभित्र रोगसँग लड्ने क्षमतामा उल्लेखनीय वृद्धि गर्छ। संक्रमणको जोखिम घटाउनुका साथै फ्री रेडिकल्सबाट हुने कोशिकीय क्षति कम गर्न मद्दत गर्छ, जुन आजको प्रदूषित वातावरणमा अति आवश्यक गुण हो।

सजिवनमा पाइने फाइबरले आन्द्राको सरसफाइमा सघाउँछ। कब्जियत, अपच, एसिडिटीजस्ता समस्याबाट छुटकारा दिलाउन यसको सूप निकै प्रभावकारी साबित भइरहेको छ। हल्का सुप पाचनका लागि सहज, झन सजिलो तरिकाले शरीरमा लाग्दछ।

सजिवन सूप कलेजोको स्वास्थ्यका लागि पनि उत्तिकै लाभदायक छ। यसले विषाक्त पदार्थलाई हटाउन सघाउँछ र कलेजोको कार्यशैली सुधार्न मद्दत गर्छ। विशेष गरी किशोरावस्थामा बालबालिकाको समुचित विकासका लागि यसको सेवन उपयुक्त मानिन्छ।

सजिवनको सुप मधुमेह भएका बिरामीका लागि एक प्राकृतिक उपाय हो। यसको फाइबर र एन्टिअक्सिडेन्टले रगतमा चिनीको मात्रा नियन्त्रण गर्छ। साथसाथै, यसले इन्सुलिन प्रतिरोध घटाउने काम पनि गर्छ। साथै, श्वासप्रश्वासमा समस्या भएकाहरूका लागि पनि यसको सुप राहतदायक हुन्छ।

सजिवनको सुप बनाउने प्रक्रिया सजिलो छ—ड्रमस्टिक टुक्र्याएर पानीमा उमाल्ने, अलिकति नुन, खुर्सानी र बेसार मिसाएर पकाउने। स्वादको लागि लसुन, अदुवा र टमाटर थप्न सकिन्छ।