काठमाडौं, २१ चैत । जब पनि संसारका धनी व्यक्तिहरूको चर्चा हुन्छ, अधिकांश अवस्थामा पुरुषहरूकै नाम अगाडि आउँछ। तर, के तपाईंलाई थाहा छ कि विश्वकै धनी महिला को हुन्?
हुरुन ग्लोबल रिच लिस्ट २०२५ अनुसार, एलिस वाल्टन हाल विश्वकै सबैभन्दा धनी महिला बनेकी छिन्। उनको कुल सम्पत्ति १०२ बिलियन अमेरिकी डलर पुगेको छ, जसले उनलाई आर्थिक रूपमा महिलाहरूबीच शीर्ष स्थानमा उभ्याएको छ।
वालमार्टका संस्थापक साम वाल्टनकी छोरी एलिस वाल्टनले आफ्नो सम्पत्ति खुद व्यवसायमार्फत नभई आफ्नो व्यक्तिगत लगानी र रुचिहरूबाट बढाएकी छिन्। उनले वालमार्टको दैनिक सञ्चालनमा कुनै सक्रिय भूमिका नलिए पनि, आफ्नो शौक तथा लगानीका कारण चर्चामा रहेकी छिन्।
एलिस वाल्टन कलाप्रेमी हुन्। १० वर्षको उमेरमा उनले पहिलो पटक २ अमेरिकी डलरमा पिकासोको चित्रको प्रतिलिपि किनिन्। आज, उनको निजी कला संग्रहमा एन्डी वारहोल, नर्मन रकवेल, र जर्जिया ओ’कीफेजस्ता प्रसिद्ध कलाकारका महत्त्वपूर्ण चित्रहरू रहेका छन्, जसको मूल्य ५०० मिलियन अमेरिकी डलरभन्दा बढी छ।
सन् २०११ मा उनले अमेरिकाको अर्कान्सास राज्यमा ‘क्रिस्टल ब्रिज म्युजियम अफ अमेरिकन आर्ट’ स्थापना गरिन्, जुन अमेरिकी कला तथा संस्कृतिको संरक्षण तथा प्रवर्द्धनका लागि निर्माण गरिएको हो।
कला मात्र होइन, एलिस वाल्टन राजनीतिमा पनि सक्रिय रूपमा रुचि राख्छिन्। सन् २०१६ को अमेरिकी राष्ट्रपतीय चुनावमा उनले हिलारी क्लिन्टनको चुनावी अभियानका लागि ३.५ लाख अमेरिकी डलर दान दिएकी थिइन्, जसका कारण पनि उनी चर्चामा रहिन्।
