काठमाडौं । गुगलले जिमेललगायतका सेवाहरूमा दुई-चरणीय प्रमाणीकरण (टू-स्टेप भेरिफिकेसन) प्रणालीलाई थप सुरक्षित बनाउन क्यूआर कोडमार्फत प्रमाणीकरण गर्ने तयारी गरेको छ। अब परम्परागत ६ अङ्कको एसएमएस कोड प्रविष्ट गर्नुपर्ने झन्झट हट्दैछ, र प्रयोगकर्ताहरूले क्यूआर कोड स्क्यान गरेर आफ्नो खातामा सहज र सुरक्षित पहुँच पाउनेछन्।
साइबर ठगी, सिम स्वापिङ, फिसिङ आक्रमण जस्ता अनधिकृत पहुँच रोक्न गुगलले नयाँ प्रविधि अपनाउन लागेको हो। हालसम्म, मोबाइलमा आएको ओटीपी (एकपटक प्रयोग गर्न मिल्ने पासकोड) प्रविष्ट गरेर प्रमाणीकरण गरिन्थ्यो, तर ह्याकरहरूले यसलाई विभिन्न तरिकाले दुरुपयोग गर्दै आएकाले सुरक्षा प्रविधिमा सुधार आवश्यक देखिएको हो।
गुगलको यो नयाँ प्रणाली लागू गर्न ट्राफिक पम्पिङ तथा टोल ठगी जस्ता साइबर अपराधहरू रोक्ने मुख्य उद्देश्य रहेको छ। ट्राफिक पम्पिङ अन्तर्गत अपराधीहरूले प्रयोगकर्ताका मोबाइल नम्बरहरूमा अनावश्यक एसएमएस पठाएर आर्थिक लाभ लिने गर्छन्। नयाँ क्यूआर प्रमाणीकरण प्रणालीले यस्तो गतिविधि रोक्ने विश्वास गरिएको छ।
गुगलका प्रवक्ता रस रिचेन्डरफरका अनुसार एसएमएस कोडहरू प्रयोगकर्ताहरूका लागि जोखिमपूर्ण बन्न थालेका छन्। उनले भने, “हामी प्रयोगकर्ताको सुरक्षालाई उच्च प्राथमिकता दिँदैछौँ। क्यूआर प्रमाणीकरण प्रणालीले खाताहरूलाई थप सुरक्षित बनाउनेछ।”
गुगलले सुरक्षासम्बन्धी नयाँ सुधारहरू लागू गर्दै ह्याकर आक्रमण तथा साइबर जोखिम कम गर्ने रणनीति अपनाइरहेको छ। क्यूआर कोडमार्फत प्रमाणीकरणको नयाँ प्रविधि प्रयोगकर्ताहरूका लागि सुरक्षित र सरल दुवै हुने बताइएको छ।
