काठमाडौं । आज देशभरका शिवालयहरू भक्तजनको भीडले भरिभराउ छन्। हिन्दू धर्मावलम्बीहरूको प्रमुख चाड महाशिवरात्रि पशुपतिनाथ मन्दिरसहित देशका विभिन्न भागमा धूमधामका साथ मनाइँदैछ। भगवान् शिवको आराधना गर्न हजारौँ श्रद्धालुहरू बिहानैदेखि नदी, तलाउमा स्नान गरी शिवालयमा दर्शन गर्न पुगेका छन्।
पशुपतिनाथमा विशेष रौनक, लाखौँ भक्तजनको उपस्थिति यस वर्ष पशुपतिनाथ मन्दिरमा १० लाखभन्दा बढी भक्तजन उपस्थित हुने अनुमान गरिएको छ। मन्दिर परिसर विशेष रूपमा सिँगारिएको छ भने विदेशी फूलमालाले झिलीमिली पारिएको छ। बिहान ३ बजे नै चार ढोका खोलिएपछि भक्तजनहरू पूजाअर्चनाका लागि लामबद्ध भएका छन्।
विशेष पूजा व्यवस्थापन अन्तर्गत चार प्रहरमा चार विशेष पूजाहरू सम्पन्न गरिनेछ। लाखौँ बेलपत्र अर्पण गरिनुका साथै दीपोत्सव, महादीप, अखण्डदीपको आयोजना गरिएको छ।
दर्शन व्यवस्थापन: भक्तजनको सहजताका लागि विशेष पहल पशुपति क्षेत्र विकास कोषले दर्शनार्थीहरूका लागि विभिन्न मार्गहरूको व्यवस्था मिलाएको छ। मित्रपार्क, गौरीघाट, रुद्रगाडेश्वर, जयवागेश्वरी, बत्तीसपुतली, एअरपोर्ट क्षेत्र हुँदै पशुपतिनाथ पुग्ने तीनवटा अलग–अलग दर्शन मार्गहरू बनाइएको छ। यसले भक्तजनहरूलाई सहज रूपमा दर्शन गर्न मद्दत गर्ने अपेक्षा गरिएको छ।
शिवरात्रिको धार्मिक र आध्यात्मिक महत्त्व महाशिवरात्रि भगवान् शिवको उत्पत्तिसँग जोडिएको पवित्र पर्व हो। शास्त्रअनुसार, फागुन कृष्ण चतुर्दशीको रात भगवान् शिवले आफ्नो दिव्य स्वरूप धारण गरेकाले यो रातलाई विशेष मानिन्छ। यस रात उपवास बसेर पूजा–अर्चना गर्दा पुण्य प्राप्त हुने धार्मिक विश्वास छ।
मठमन्दिरमा जाग्राम, भजनकीर्तनको धुन देशभरका शिव मन्दिरहरूमा रातभर जाग्राम बस्ने चलन छ। भजनकीर्तनसहित शिव भक्ति गुञ्जिएको छ। पशुपतिनाथसहित गोकर्णेश्वर, डोलेश्वर, हलेसी महादेव, बागेश्वरी महादेवजस्ता प्रसिद्ध मन्दिरहरूमा समेत भक्तजनहरूको घुइँचो लागेको छ।
महाशिवरात्रिको अवसरमा पशुपति क्षेत्रमा सुरक्षा व्यवस्थासमेत कडा पारिएको छ। भक्तजनहरूको सुविधाका लागि विभिन्न ठाउँमा खानेपानी, प्राथमिक उपचार र स्वयंसेवकहरूको टोली परिचालित गरिएको छ।
