काठमाडौं – ताप्लेजुङको पाथीभरा क्षेत्रमा निर्माणाधीन केबलकार परियोजनासँग सम्बन्धित विवाद समाधान गर्न सरकार वार्तामार्फत सहमति खोज्न इच्छुक रहेको बताएको छ। गृह मन्त्रालयले स्थानीय विरोधका कारण रोकिएको निर्माण कार्यलाई संवादबाट समाधान गर्न ‘नो केबलकार’ अभियानका प्रतिनिधिहरूलाई पुनः वार्तामा आउन आग्रह गरेको छ।
गृहमन्त्रालयद्वारा गठित वार्ता समितिका संयोजक प्रेमप्रसाद भट्टराईले पाथीभरा क्षेत्रको सामाजिक, धार्मिक, तथा सांस्कृतिक चासोलाई ध्यानमा राख्दै समस्या समाधान गर्न सबै पक्षलाई सहमतिमा पुग्न अपिल गरे।
सरकारले माघ २० गते गठन गरेको वार्ता समितिले आन्दोलनरत पक्षसँग निरन्तर संवाद गरिरहेको भए पनि गत वार्ता असफल भएपछि पुनः वार्ताका लागि खुला रहन आग्रह गरेको हो।
भट्टराईले भने,
“केबलकार निर्माणको क्रममा देखिएका सामाजिक, धार्मिक, सांस्कृतिक तथा स्थानीय समुदायका समस्यालाई शान्तिपूर्ण संवादको माध्यमबाट सम्बोधन गर्ने प्रयास भइरहेकाले आन्दोलनरत पक्षलाई वार्तामा आउन पुनः अनुरोध गर्दछौं।”
‘नो केबलकार’ अभियानका समर्थकहरूले पाथीभरा क्षेत्रमा केबलकार निर्माण धार्मिक र सांस्कृतिक दृष्टिकोणले अनुपयुक्त रहेको दाबी गर्दै आएका छन्। उनीहरूको भनाइमा यसले परम्परागत तीर्थयात्राको महत्वलाई कम गर्नेछ भने स्थानीय समुदायको भावना समेत उपेक्षित हुनेछ।
सरकार र निर्माण कम्पनी भने केबलकारले धार्मिक पर्यटकको संख्या बढाउने, स्थानीय अर्थतन्त्रमा टेवा पुग्ने र यात्रुहरूको सहजता बढाउने तर्क प्रस्तुत गरिरहेका छन्।
यसअघि वार्ता भए पनि सरकार केबलकार निर्माण स्थायी रूपमा रोक्न सहमत नभएपछि सहमति हुन सकेको थिएन। अब भने सरकारले वार्तालाई नयाँ रूपमा अघि बढाउने संकेत दिएको छ।
