काठमाडौं । काठमाडौं–तराई–मधेस द्रुतमार्ग (फास्ट ट्रयाक) निर्माण कार्यलाई थप समय लाग्ने भएको छ। निर्माण कार्यमा देखिएको अवरोधका कारण परियोजनाको समयसीमा बढ्ने सम्भावना रहेको नेपाली सेनाले जनाएको छ।
प्राकृतिक विपत्ति र कानुनी विवाद मुख्य अवरोध नेपाली सेनाका अनुसार असोज १२ र १३ गतेको भीषण वर्षाले निर्माण कार्यमा बाधा पुर्याएको छ। साथै, ललितपुरको खोकनामा देखिएको जग्गा विवादले समयमै समाधान नपाए परियोजनाको अवधि थप गर्नुपर्ने बाध्यता रहनेछ।
नेपाली सेनाका एक अधिकारीले भने, “हामी कुनै पनि हालतमा फास्ट ट्रयाक निर्माणको जिम्मेवारीबाट पछाडि हट्दैनौं। दिनरात प्रयास गरिरहेका छौं, तर प्राकृतिक विपत्तिलाई रोक्न सकिँदैन। रुख कटान लगायतका प्रक्रिया लामो भएकाले पनि ढिलाइ भएको हो।”
फास्ट ट्रयाकको संरचना र विशेषता ७२.५ किलोमिटर लामो फास्ट ट्रयाकमा ५५.५ किलोमिटर सडक, ६.४१ किलोमिटर सुरुङ मार्ग र १०.५९ किलोमिटर पुल निर्माण हुनेछ। पहाडी क्षेत्रमा २५ मिटर र समथर भूभागमा २७ मिटर फराकिलो सडक बनाइँदैछ।
तीन स्थानमा सुरुङ मार्ग निर्माण हुनेछ:
- महादेवडाँडामा ३.३३५ किमी
- धेद्रेमा १.६३० किमी
- लैनडाँडामा १.४३० किमी
त्यस्तै, कुल ८७ पुलमध्ये १६ विशेष प्रकृतिका पुल र ७१ अन्य पुल रहनेछन्।
परियोजनाको लागत र समयरेखा २०७४ वैशाख २१ गतेको मन्त्रिपरिषद बैठकले द्रुतमार्ग निर्माण जिम्मा नेपाली सेनालाई दिने निर्णय गरेको थियो। २०७६ भदौ १ गते स्वीकृत डीपीआर अनुसार परियोजनाको अनुमानित लागत १ खर्ब ७५ अर्ब रुपैयाँ छ।
योजनाको प्रभावकारी कार्यान्वयनका लागि अवरोध समाधान गर्न सरोकारवालाबीच सहकार्य आवश्यक रहेको सरोकारवालाहरू बताउँछन्।
