काठमाडौं, फागुन ११ – नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालका विशाल कृषि सम्भावनालाई अधिकतम रूपमा उपयोग गर्न सुधार र सहकार्य अनिवार्य रहेको बताएका छन्।
आइतवार काठमाडौंमा आयोजित नेपाल कन्ट्री इन्भेस्टमेन्ट राउन्डटेबल मा बोल्दै अध्यक्ष ढकालले कृषि अर्थतन्त्र नेपालको मेरुदण्ड भए पनि आधुनिकरणको अभाव, वित्तीय पहुँचको सीमितता, खण्डित भूमि स्वामित्व, र परम्परागत प्रविधिले अपेक्षित सफलता हासिल गर्न नसकेको बताए।
कृषि क्षेत्रका प्रमुख चुनौती र समाधानका उपाय
उनका अनुसार कृषि क्षेत्रले ठूलो संख्यामा रोजगारी सिर्जना गरे पनि किसानहरूलाई आधुनिक प्रविधि, वित्तीय स्रोत, र बजारसँग जोड्ने प्रणाली सुदृढ गर्न आवश्यक छ। उनले विशेषगरी कृषि मूल्य शृङ्खला सुधार, साना तथा मझौला कृषिउद्यमका लागि पूँजी पहुँच वृद्धि, र ग्रामीण पूर्वाधारमा लगानी विस्तार गर्नु अपरिहार्य रहेको उल्लेख गरे।
वित्तीय पहुँच र लगानी प्रवर्द्धनमा जोड
ढकालले रेमिट्यान्सलाई औपचारिक अर्थतन्त्रमा ल्याउने, ग्रामीण क्षेत्रमा वित्तीय सेवाहरू विस्तार गर्ने, महिला उद्यमी र साना व्यवसायहरूलाई सशक्त बनाउने कार्यमा व्यक्तिगत रूपमा पनि सक्रिय रहेको जानकारी दिए।
नेपालको आर्थिक परिदृश्यलाई बदल्न महासंघको नेतृत्वमा नेपाल डेभलपमेन्ट पब्लिक लिमिटेड स्थापनाको पहल गरिएको बताउँदै उनले निजी क्षेत्र, सरकार, र विकास साझेदारहरूको सहकार्यमार्फत नेपाललाई आर्थिक समृद्धिको दिशामा अघि बढाउन आवश्यक रहेको औंल्याए।
नेपालको कृषि तथा विकास परियोजनाहरूमा अन्तर्राष्ट्रिय साझेदारहरूको निरन्तर सहयोगको प्रशंसा गर्दै ढकालले सहकार्यबाट मात्र दीर्घकालीन आर्थिक समृद्धि सम्भव हुने धारणा व्यक्त गरे।
