काठमाडौं। विश्वप्रसिद्ध व्यवसायिक रियालिटी शो ‘शार्क ट्याङ्क’ को नेपाली संस्करण ‘शार्क ट्याङ्क नेपाल’ घोषणा गरिएको छ। हिमालय टेलिभिजनले उत्पादन र प्रसारण अधिकार प्राप्त गर्दै आगामी केही महिनाभित्र शो प्रसारण गर्ने तयारी गरेको छ।
पाँच शार्क सार्वजनिक
सोमबार आयोजित कार्यक्रममा पहिलो सिजनका पाँच जना शार्कको नाम सार्वजनिक गरियो। ती शार्कहरू:
- हेमराज ढकाल – सहसंस्थापक, आईएमई ग्रुप
- क्याविनेट श्रेष्ठ – संस्थापक, अग्नी ग्रुप
- ऋतुसिंह बैद्य – निर्देशक, बैद्य अर्गनाइजेसन
- आनन्द बगरिया – प्रबन्ध निर्देशक, निम्बस ग्रुप
- शौरभ ज्योति – निर्देशक, पद्दम ज्योति ग्रुप
यी प्रतिष्ठित व्यवसायीहरूले उत्कृष्ट व्यावसायिक विचार प्रस्तुत गर्ने स्टार्टअपमा लगानी गर्नेछन्। थप दुई शार्कको नाम पछि सार्वजनिक गरिनेछ।
२० एपिसोडको श्रृङ्खला
‘शार्क ट्याङ्क नेपाल’ पहिलो सिजन २० एपिसोडमा प्रसारण हुनेछ। नेपाली उद्यमीहरूले व्यवसाय विस्तारका लागि लगानीको प्रस्ताव राख्न हिमालय टेलिभिजनको एप र वेबसाइटमार्फत आवेदन दिन सक्नेछन्। आवेदन म्याद २०८१ पुष १५ सम्म तोकिएको छ।
वैश्विक सफलताबाट प्रेरणा
‘शार्क ट्याङ्क’ ५० भन्दा बढी देशमा प्रसारित शो हो। सोनी पिक्चर्स टेलिभिजनकी दक्षिण एशिया उपाध्यक्ष सोनिका भासिनका अनुसार, यो कार्यक्रमले दक्षिण एशियाका उद्यमीहरूलाई सशक्त बनाउँदै नेपाली नवप्रवर्तनलाई अन्तर्राष्ट्रिय मञ्चमा लैजानेछ।
हिमालय टेलिभिजनको पहल
हिमालय टेलिभिजनले यसअघि ‘द भ्वाइस अफ नेपाल’, ‘भ्वाइस किड्स’, ‘हिमालय रोडिज’, र ‘डान्सिङ स्टार’ जस्ता अन्तर्राष्ट्रिय शोहरू नेपालमा सफलतापूर्वक प्रसारण गरिसकेको छ। कार्यकारी निर्देशक श्याम कडेलका अनुसार, ‘शार्क ट्याङ्क नेपाल’ केवल रियालिटी शो नभई नेपाली स्टार्टअप इकोसिस्टमलाई नयाँ उचाइमा लैजाने विश्वास गरिएको छ।
