काठमाडौं, चैत २० – अमेरिकी राष्ट्रपति डोनाल्ड ट्रम्पले ‘रेसिप्रोकल टैरिफ’ (जस्तालाई तस्तै कर) नीति घोषणा गर्ने तयारी गरेका छन्, जसले भारतसहित विश्वभरका व्यापारिक सम्बन्धहरूमा नयाँ मोड ल्याउने देखिन्छ।

ह्वाइट हाउसका अनुसार, ट्रम्पले बुधबार ‘मेक अमेरिका वेल्दी अगेन’ कार्यक्रममा सम्बोधन गर्दै यो नयाँ कर नीतिको औपचारिक घोषणा गर्नेछन्। ह्वाइट हाउसकी प्रेस सचिव कैरोलीन लेविटका अनुसार, ट्रम्पको घोषणासँगै नयाँ कर प्रणाली तुरुन्तै लागू हुनेछ।

अमेरिकी संसदको संयुक्त अधिवेशनमा ट्रम्पले भारतले अमेरिकी उत्पादनमा १०० प्रतिशतभन्दा बढी कर लगाउने गरेको भन्दै अब अमेरिकाले पनि त्यही गर्ने बताएका थिए। ‘हामीले अब जस्तालाई तस्तै जवाफ दिनुपर्छ,’ ट्रम्पले भने।

उनले व्यंग्यात्मक शैलीमा थपे, ‘मैले यो कर अप्रिल १ देखि लागू गर्न चाहेको थिएँ, तर त्यो दिन अप्रिल फूल पर्ने भएकाले अप्रिल २ रोजेँ।’

ट्रम्पको भन्सार शुल्क घोषणाको कडा प्रतिक्रिया जनाउँदै चीन, जापान र दक्षिण कोरियाले आपसी व्यापार प्रवर्द्धन गर्न स्वतन्त्र व्यापार सम्झौताका सम्भावनाहरू खोजिरहेका छन्।

भारतले अमेरिकी दाबीहरू खण्डन गर्दै आएको छ। भारतीय वाणिज्य सचिव सुनील बर्थवालले भारत र अमेरिकाबीच भन्सार शुल्क कटौतीबारे कुनै औपचारिक सहमति नभएको बताएका छन्।