काठमाडौँ । संयुक्त राष्ट्रसंघका महासचिव एन्टोनियो गुटेरेस बंगलादेशको कोक्स बजारस्थित रोहिंग्या शरणार्थी शिविरको अवलोकन गर्न पुगेका छन्। उनले त्यहाँ रहेका लाखौँ शरणार्थीहरूको कठिन अवस्था प्रत्यक्ष अवलोकन गर्दै अन्तर्राष्ट्रिय समुदायलाई थप सहयोगको लागि आह्वान गर्ने अपेक्षा गरिएको छ। गुटेरेसको यो भ्रमण विशेष महत्त्वपूर्ण मानिएको छ, किनकि हालै मात्र विश्व खाद्य कार्यक्रम (WFP) लगायतका संस्थाहरूले सहायतामा कटौती गर्ने घोषणा गरेका छन्। अमेरिकी सहायता निकाय युएसएडले समेत आफ्नो सहयोग रोक्न थालेपछि शरणार्थीहरूको दैनिकी थप जटिल बन्दै गएको छ। बंगलादेश सरकारले गुटेरेसको उपस्थितिले रोहिंग्या शरणार्थीहरूको समस्या अन्तर्राष्ट्रिय मञ्चमा पुनः उजागर गर्ने विश्वास व्यक्त गरेको छ। अन्तरिम सरकारले विशेष गरी आर्थिक सहायता जुटाउन र दीर्घकालीन समाधान खोज्न यो भ्रमण फलदायी हुने आशा गरेको छ। यस क्रममा गुटेरेसले बंगलादेश सरकारका प्रमुख सल्लाहकार मोहम्मद युनुससँग भेटवार्ता गर्दै बंगलादेशलाई नयाँ परिवर्तनको अवस्थामा पनि संयुक्त राष्ट्रसंघको निरन्तर सहयोग रहने प्रतिबद्धता व्यक्त गरेका छन्। रोहिंग्या शरणार्थी संकट एक दशकभन्दा बढी समयदेखि बंगलादेशको कूटनीति र मानवीय सहायता रणनीतिमा महत्वपूर्ण मुद्दा रहँदै आएको छ।
जनवाच
