काठमाडौं– राष्ट्रिय प्रजातन्त्र पार्टी नेपालका अध्यक्ष कमल थापाले पूर्वप्रधानमन्त्री बाबुराम भट्टराईको पछिल्लो टिप्पणीप्रति असन्तुष्टि जनाउँदै उनलाई हतास मानसिकताको आरोप लगाएका छन्।
थापाले पूर्वराजा ज्ञानेन्द्र शाहको हालैको अभिव्यक्तिलाई लिएर भट्टराईले गरेको आलोचनालाई अनावश्यक बताउँदै प्रतिक्रिया दिएका छन्। उनले राजा शाहले सरकार वा राजनीतिक दलहरूको विरोध नगरेको स्पष्ट पार्दै, भट्टराईको प्रतिक्रियालाई ‘दुर्भाग्यपूर्ण’ भनेका छन्।
राजनीतिक अभिव्यक्तिको अधिकार सबैलाई समान?
थापाले बाबुराम भट्टराईलाई प्रश्न गर्दै भने, “राजाले देशको वर्तमान अवस्थाप्रति चिन्ता व्यक्त गर्ने र संकट समाधानका लागि सहयोग गर्ने विचार राख्न पाउनुहुन्न? विचार अभिव्यक्तिको अधिकार बाबुराम भट्टराई र उनका समर्थकहरूको मात्र हो?” उनले संविधानले नागरिकलाई विचार राख्ने अधिकार दिएको भन्दै त्यसलाई कुण्ठित गर्ने अधिकार कसैलाई नभएको बताए।
संविधान संशोधनको विकल्प खुला
थापाले जनताको चाहनाअनुसार संघीय धर्मनिरपेक्ष गणतन्त्रलाई पुनर्विचार गर्न सकिने उल्लेख गर्दै भने, “संविधानले नै परिवर्तनको ढोका खुला राखेको छ। गणतन्त्र, संघीयता वा धर्मनिरपेक्षताको समीक्षा गर्न सकिँदैन भन्ने हठ कसले लादेको हो?”
उनले बाबुराम भट्टराईको विचारलाई ‘निरंकुश’ र ‘फासिस्ट’ बताउँदै भने, “राजाले गणतन्त्रबारे कुनै नकारात्मक कुरा नै गर्नुभएको छैन, बाबुरामजी किन यति असहिष्णु देखिनुभएको?”
सडक संघर्षको चेतावनी
थापाले आफू १८ वर्षदेखि निरन्तर गणतन्त्र, संघीयता र धर्मनिरपेक्षताको पुनरावलोकनको पक्षमा रहेको दोहोर्याउँदै भने, “सक्नुहुन्छ भने हामीलाई नियन्त्रण गरेर देखाउनुहोस्। राजासहितको प्रजातन्त्र, हिन्दु राष्ट्र पुनःस्थापना र संघीयता खारेज गर्न चाहने लाखौं जनतालाई रोक्न सक्नुहुन्छ?” उनले हालको राजनीतिक व्यवस्थाप्रति व्यापक असन्तोष रहेको दाबी गरे।
इतिहास दोहोरिन्छ?
थापाले बाबुराम भट्टराईले विगतमा राजासँग सहकार्य गर्न खोजेको स्मरण गराउँदै भने, “२०६० सालमा हापुरे वार्ताको बेला मात्र होइन, संविधानसभा चुनावअघि पनि प्रचण्डसहित राजासँग सहकार्य गर्ने प्रस्ताव ल्याउनुभएको थियो। अहिले फेरि किन फरक बाटो लिनुभयो?”
अन्त्यमा, उनले सबै राजनीतिक शक्तिहरूबीच सामञ्जस्य खोज्न आग्रह गर्दै भने, “सत्ताको खेलमा मात्रै नअल्झौं। परम्परागत र परिवर्तनकारी शक्तिबीच सामञ्जस्य खोजौं, मौलिक प्रजातन्त्रको विकास गरौं।”
