काठमाडौं, ९ चैत । आकर्षक रोजगारीको सपना देखाउँदै माल्टा पठाउने भन्दै ठगी गर्ने एक व्यक्ति प्रहरी नियन्त्रणमा परेका छन्। वैदेशिक रोजगारीको लोभमा परेर ठगिने घटनाहरू दिनप्रतिदिन बढ्दै गइरहेका छन्, जसले धेरैलाई आर्थिक तथा मानसिक पीडा पु¥याइरहेको छ।
प्रहरीका अनुसार, सुर्खेत वीरेन्द्रनगर नगरपालिका–९ स्थायी घर भई काठमाडौं बुढानिलकण्ठ नगरपालिका–९ बस्ने ५१ वर्षीय प्रकाशबहादुर सिंहलाई बुधबार पक्राउ गरिएको छ। उनले एक जना पीडितबाट ७ लाख ७० हजार रुपैयाँ असुलेर सम्पर्कविहीन भएको उजुरीका आधारमा उनलाई प्रहरीले पक्राउ गरेको हो।
काठमाडौं उपत्यका अपराध अनुसन्धान कार्यालय, टेकुबाट खटिएको टोलीले सिंहलाई बुढानिलकण्ठ नगरपालिका–६, सरस्वती कोलोनीबाट पक्राउ गरेको जनाएको छ। प्रारम्भिक अनुसन्धानका क्रममा उनले अन्य व्यक्तिहरूसँग पनि ठगी गरेको आशंका गरिएको छ।
सिंहलाई वैदेशिक रोजगार विभाग, ताहाचल, काठमाडौं पठाई आवश्यक अनुसन्धान तथा कारबाही अगाडि बढाइएको छ।
