काठमाडौं, १३ फागुन । महाशिवरात्रिको पावन अवसरमा भक्तजनहरूमा विशेष उत्साह छाउँदै गर्दा पशुपतिनाथ मन्दिरमा सुरक्षा तथा व्यवस्थापनका विषयले प्राथमिकता पाएको छ। यसै सन्दर्भमा, प्रधानमन्त्री केपी शर्मा ओलीले आज साँझ पशुपतिनाथ मन्दिर पुगेर दर्शन तथा अवलोकन गर्नुका साथै व्यवस्थापनको तयारीबारे जानकारी लिएका छन्।
प्रधानमन्त्री ओलीले पशुपति क्षेत्र विकास कोषका पदाधिकारीहरूसँग भेट गरी भक्तजनहरूको सहज दर्शन सुनिश्चित गर्न निर्देशन दिएका छन्। उनले महाशिवरात्रि पर्वलाई अनुशासित, मर्यादित र व्यवस्थित बनाउन विशेष ध्यान दिनुपर्ने बताउँदै सुरक्षा व्यवस्थालाई प्रभावकारी बनाउन सम्बद्ध निकायलाई आग्रह गरे।
प्रधानमन्त्रीसँगै संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे, मन्त्रालयका सचिव विनोदप्रकाश सिंह, काठमाडौंका प्रमुख जिल्ला अधिकारी ऋषिराम तिवारीलगायत अधिकारीहरू पनि पशुपति पुगेका थिए। मन्दिर परिसरमा प्रधानमन्त्रीलाई देखेर उपस्थित भक्तजनहरू उत्साहित भएका थिए।
यसैबीच, काठमाडौं जिल्ला प्रशासन कार्यालयले एक सूचना जारी गर्दै फागुन १२ देखि १५ गतेसम्म मन्दिर क्षेत्रभित्र मासु, मदिरा तथा नसालु पदार्थको उत्पादन, बिक्री-वितरण, ओसारपसार, भण्डारण र सेवनमा पूर्ण प्रतिबन्ध लगाएको छ।
महाशिवरात्रिका दिन लाखौँ श्रद्धालुहरूको आगमन हुने भएकाले सुरक्षा व्यवस्थामा विशेष सतर्कता अपनाइँदैछ। भक्तजनहरूले शान्तिपूर्ण र सुव्यवस्थित रूपमा दर्शन गर्न पाउन भन्ने विषयलाई प्राथमिकता दिइएको अधिकारीहरूले बताएका छन्।
