काठमाडौं, चैत्र १३ – डेढ करोड रुपैयाँ बराबरको बैङ्किङ कसुर मुद्दामा लामो समयदेखि फरार रहेका विराज तामाङलाई प्रहरीले पक्राउ गरेको छ। नुवाकोटको ककनी गाउँपालिका–४ स्थायी बासिन्दा तथा हाल काठमाडौं, नागार्जुन नगरपालिका–६ रामकोटमा बस्दै आएका ३६ वर्षीय तामाङलाई काठमाडौं उपत्यका अपराध अनुसन्धान कार्यालयको टोलीले नयाँ बानेश्वरबाट पक्राउ गरेको हो।

तामाङविरुद्ध विभिन्न प्रहरी कार्यालयहरूमा नौ वटा मुद्दा दर्ता रहेका छन्, जसमा बैङ्किङ कसुरसँग सम्बन्धित आर्थिक अपराधहरू समेटिएका छन्। इन्दिरा खड्कालगायतका व्यक्तिहरूको जाहेरीका आधारमा दायर भएको मुद्दामा उनी फरार रहेका थिए।

प्रहरीका अनुसार तामाङले एक करोड ४६ लाख ४४ हजार रुपैयाँ बराबरको आर्थिक ठगी गरेको आरोप छ। उनलाई अनुसन्धानका लागि महाराजगन्ज प्रहरी वृत्तमा पठाइएको छ। प्रहरीका अनुसार उनीविरुद्धको कानुनी प्रक्रिया अघि बढाइनेछ।